Навукоўцы: Зялёныя насаджэнні дапамагаюць пазбавіцца ад шкодных звычак

Людзям трэба проста глядзець у акно на дрэвы, каб перамагчы змрочны настрой.

Справаздача, апублікаваная ў часопісе Health&Place, упершыню паказала сувязь паміж уздзеяннем прыроды, рознымі залежнасцямі і негатыўнымі эмоцыямі, піша «Вокруг света».

Даследчыкі з Школы псіхалогіі Плімутскага ўніверсітэта спыталі 149 рэспандэнтаў ва ўзросце ад 21 да 65 гадоў пра тое, ці шмат зялёных насаджэнняў знаходзіцца ў іх у акрузе, як часта яны бываюць у садзе і ці наведваюць грамадскія зялёныя зоны.

У даследаванні таксама задаваліся пытанні аб тым, ці маюць удзельнікі дэпрэсію і трывогу, а таксама пра цягу да такіх рэчаў, як кафеін, шакалад, алкаголь і нікацін. Рэспандэнты ацанілі інтэнсіўнасць, вобразнасць і дакучлівасць сваіх прыхільнасцяў па 11-бальнай шкале.

Даследнікі выявілі, што наяўнасць зялёных насаджэнняў, якія можна ўбачыць з акна свайго дома, спрыяла зніжэнню цягі да шкодных рэчаў. Эфект быў асабліва прыкметны, калі больш за 25 працэнтаў звыклага пейзажу рэспандэнта былі зялёнымі.

Экатэрапія

Папярэдняе падобнае даследаванне псіхолагаў з Мічыганскага ўніверсітэта тычылася ў асноўным практыкаванняў на прыродзе: у 2015 годзе навукоўцы давялі, што 90-хвілінныя групавыя прагулкі на прыродзе эфектыўныя ў барацьбе з дэпрэсіяй і іншымі разладамі псіхікі.

Але людзям з абмежаванымі магчымасцямі або тым, у каго проста няма часу на 90-хвілінны шпацыр, новае даследаванне прапануе альтэрнатыву: проста глядзець у акно на дрэвы, каб перамагчы дрэнныя звычкі і змрочны настрой.

Даследнікі спадзяюцца, што іх адкрыццё паўплывае на праграмы грамадскай аховы здароўя і даступнасць зялёных зон.

Гэтая праца з'яўляецца часткай вобласці даследаванняў, вядомай як экатэрапія. Экатэрапія вывучае, як людзі і прырода могуць узаемадзейнічаць, прыносячы карысць адзін аднаму.