Новы прэм'ер Вялікай Брытаніі назваў дату, да якой збіраецца скончыць Brexit

Борыс Джонсан паабяцаў вывесці краіну з ЕЗ.

Новы прэм'ер-міністр Вялікай Брытаніі Борыс Джонсан заявіў, што выведзе краіну з Еўрапейскага Звязу 31 кастрычніка.

Як паведамляе «Европейская правда», пра гэта ён заявіў у сваім выступе пасля абрання лідарам Кансерватыўнай партыі.

«Мы збіраемся актывізаваць краіну. Мы збіраемся скончыць Brexit 31 кастрычніка, і мы збіраемся скарыстацца ўсімі магчымасцямі, якія гэта прынясе», - сказаў Джонсан.

Сярод сваіх галоўных прыярытэтаў ён назваў «выканаць Brexit, аб'яднаць краіну і перамагчы Джэрэмі Корбіна (лідара лейбарыстаў, - рэд.)».

«Вы выглядаеце напалоханымі? Вы адчуваеце сябе напалоханымі? Я не думаю, што вы глядзіце спалохана на мяне. Я думаю, мы ведаем, што мы можам гэта зрабіць, і людзі гэтай краіны давяраюць нам, каб гэта зрабіць, і мы ведаем, што мы гэта зробім», - сказаў ён.

Раней Джонсан яшчэ ў статусе кандыдата ў лідары кансерватараў неаднаразова казаў, што Вялікая Брытанія выйдзе з ЕЗ у кастрычніку з дамовай або без яе.