Сенат ухваліў вылучэнца Трампа на пасаду кіраўніка Пентагона
- 23.07.2019, 21:25
- 6,327
Прызначэнне Марка Эспера павінна завяршыць самы доўгі ў гісторыі ЗША перыяд адсутнасці кіраўніка Пентагона.
Сенат ЗША ў аўторак зацвердзіў міністра Войска Марка Эспера на пасаду міністра абароны, тым самым завяршыўшы самы доўгі ў гісторыі перыяд, калі Пентагон заставаўся без пастаяннага кіраўніка, паведамляе «Голос Америки».
55-гадовы Эспер у мінулым быў лабістам зброевай кампаніі Raytheon і стаў другім зацверджаным міністрам абароны, якога прызначыў прэзідэнт Дональд Трамп.
Эспер атрымаў рашучую падтрымку з боку абедзвюх партый, нягледзячы на тое, што падчас слуханняў па зацвярджэнні яго кандыдатуры сенатарка-дэмакратка Элізабэт Уорэн задавала шмат пытанняў з нагоды яго сувязяў з Raytheon.
Уорэн, што балатуецца ў прэзідэнты на выбарах 2020 года, стала адзіным сябрам сенацкага Камітэта ўзброеных сіл, што пярэчыць супраць зацвярджэння Эспера на пасадзе.
Raytheon займае трэцяе месца сярод найбуйнейшых абаронных падрадчыкаў у ЗША.
У ЗША не было пастаяннага міністра абароны з тых часоў, як у снежні мінулага года Джым Мэціс падаў у адстаўку праз палітычныя рознагалоссі з Трампам. Многія сябры Кангрэсу заклікалі прэзідэнта ў тэрміновым парадку запоўніць гэтую вакансію.
Лідар сенацкай большасці Мітч Маканел, адкрываючы пасяджэнне ў аўторак, заклікаў калег падтрымаць кандыдатуру Эспера.
«Кандыдат валодае больш чым дастатковай кампетэнтнасцю. Яго паслужны спіс ўражвае. Яго прыхільнасць службе нашым узброеным сілам больш чым відавочная. А патрэба ў зацверджаным Сенатам міністры абароны больш чым неадкладная», - заявіў ён.
Раней Эспер працаваў памочнікам Кангрэса, а таксама служыў у Пентагоне пры адміністрацыі прэзідэнта Джорджа Буша-малодшага. Ён займаў пасаду міністра Войска з лістапада 2017 года.
Патрык Шэнахан, якога Трамп раней вылучыў на пасаду міністра абароны, зняў сваю кандыдатуру з разгляду 18 чэрвеня пасля таго, як з'явіліся паведамленні аб хатнім гвалце ў яго сям'і.