Міліцыянту прысудзілі тры гады калоніі і пазбавілі рангу за гвалт
11- 23.08.2019, 10:16
- 22,855
Малодшы лейтэнант з калегамі збіў двух жыхароў Мсціслава.
Такі прысуд атрымаў былы малодшы лейтэнант міліцыі Мікалай Раеў, які летась разам з калегамі збіў двух жыхароў Мсціслава. Для айчыннага правасуддзя гэта рэдкі прысуд для сілавіка за выкарыстанне гвалту, паведамляе «Белсат».
Два суды, згубленыя довады, узаемныя пазовы – але ўсё ж гэта адбылося. Былога малодшага лейтэнанта міліцыі Мікалая Раева, які летась збіў двух наведвальнікаў РАУС, асудзілі на тры гады і пазбавілі рангу.
Пацярпелы Аляксей Шведкаў кажа:
«Я чакаў, што будзе не крымінальны тэрмін, а які хатні арышт. Або якая іншая замена, але як выйшла - крымінальны тэрмін. Я вельмі рады. Я думаю, што ў Мсціслаўскім РАУС будзе праверка, каб ацаніць працаздольнасць работнікаў, якія таксама праходзілі паводле справы, хоць і як сведкі».
3 гады - найменшы магчымы тэрмін паводле 3 часткі 426 артыкула: перавышэнне паўнамоцтваў, спалучанае з гвалтам.
Пацярпелы сцвярджае, што асуджаны - не адзіны, хто ўдзельнічаў у ягоным з сябрам Мікалаем Купчыным збіцці. Астатнія 7 міліцыянтаў праходзілі паводле справы ў якасці сведак:
«Мяне трымалі, Купчына двое, хоць кожны з работнікаў мог спыніць гэта ўсё. Мог не даць наносіць удары. Неяк спыніць Раева. Але ніхто гэтага не зрабіў. І ніхто не панёс пакарання за гэта».
Але абскарджваць пастанову суда ён не плануе. Маўляў, задаволены і гэтым.