Як 19-гадовая дзяўчына «пачысціла» карму берасцейцы за $12 тысяч

У Беларусі сталі выконваць «магічныя» паслугі.

Жыхарка Берасця хацела развязаць асабістыя праблемы. Зрабіць гэта надумала пры дапамозе «Міланы Вілер», якая нібыта займаецца варажбой ды іншымі звышнатуральнымі паслугамі, піша intex-press.by.

У канца 2018 года жыхарка Горак зарэгістравалася ў адной з сацыяльных сетак пад імем «Мілана Вілер» і паказала фальшывыя звесткі аб тым, што яна займаецца варажбой і рознымі магічнымі рытуаламі.

У лютым 2019 года да яе звярнулася 28-гадовая жыхарка Берасця з просьбай развязаць асабістыя праблемы. Падазраваная пераканала дзяўчыну ў тым, што яна валодае адмысловымі ведамі ў галіне магічнага мастацтва і ў сілах ёй дапамагчы, але для пачатку патрэбна агульная платная дыягностыка, паведамляе Следчы камітэт.

Потым, з лютага да красавіка гэтага года, на падставе чысткі кармы, закупкі неабходных матэрыялаў, правядзення магічных рытуалаў спадарыня завалодала грашовымі сродкамі пацярпелай сумай больш як 25 тысяч рублёў. За гэты час пацярпелая больш за 50 разоў пералічвала грошы на рахунак падазраванай. Неўзабаве, пераканаўшыся, што жанчына ўвяла яе ў зман на конт сваіх спецыяльных ведаў і рэальных магчымасцяў, звярнулася ў міліцыю.

Падазраваная затрыманая, разглядаецца пытанне аб выкарыстанні да яе меры стрымання. На допыце жанчына віну прызнала цалкам і абавязалася выплаціць шкоду.

Гарэцкім раённым аддзелам Следчага камітэта ў дачыненні да яе распачатая крымінальная справа за авалодванне грашовымі сродкамі ў асабліва вялікай суме.