І зноўку добры дзень, вакханалія

Дыктатар паўтарыў усе свае штампы аб «выбарах».

Падчас прызначэння новых паслоў і кіраўнікоў раённай вертыкалі Лукашэнка традыцыйна заклікаў чыноўнікаў згуртавацца перад абліччам пагрозы «расхістаць краіну». Прагучала і паспеўшае набіць аскому слова «іспыты», і прызабытая «вакханалія» (цытуецца з паведамленняў прэс-службы), піша «Салiдарнасць».

- У палітыцы, я ўжо сказаў, мы пачалі здаваць іспыты. Сённяшняя перадвыбарчая вакханалія, інакш яе не назавеш, перад парламенцкімі выбарамі кажа пра тое, што гэта проста рэпетыцыя прэзідэнцкіх выбараў. Нам паспрабуюць не дазволіць спакойна прайсці гэтыя перыяды. А мы павінны правесці так, як мае быць. У краіне кіраванай, у нашай краіне, для сябе мы павінны правесці гэтыя выбары. І калі мы вызначыліся, што мы будзем дзейнічаць так, так і так, тактыка такая, мы павінны яе прытрымлівацца.

Затым Аляксандр Лукашэнка зрабіў цікавую агаворку аб пільнай увазе да некаторых з кандыдатаў у дэпутаты. Ён падкрэсліў, што «калі падчас парламенцкай кампаніі будуць крытыкаваць і наносіць удары па нейкіх людзях, то гэта будуць удары з далёкім прыцэлам - па яму».