Хто акрамя арабскага шэйха можа сказаць «дзякуй» Лукашэнку

Кароткі спіс адметных сяброў дыктатара.

Наследны прынц Абу-Дабі Мухамед бен Заід аль-Нахаян цёпла адазваўся пра прыём, аказаны яму ў Беларусі, піша «Салiдарнасць».

- Сказаць проста дзякуй недастаткова, каб выказаць усе мае пачуцці. Я сапраўды вельмі ўдзячны за цёплы прыём, які нам аказаны. Я пабываў у многіх дзяржавах, але, паверце мне, тут я адчуваю сябе як дома — цытуе шэйха БелТА.

Адчуваць сябе як дома ў Беларусі наследнаму прынцу падчас сустрэчы прапаноўваў Аляксандр Лукашэнка:

- У любы час на любы тэрмін прыязджайце да нас адпачыць. Тым больш лета, ды і пачатак восені ў вас (у ААЭ) з нашага пункту гледжання часы жорсткія – пад 40 градусаў, а часам і вышэй... ведайце, што гэта не чужая вам зямля. Тым больш у вас тут свой дом.

Гісторыя Вялікага сяброўства паміж кіраўніком Беларусі і кіраўнікамі ААЭ цікавая з шэрагу прычын. Узаемны гандаль паміж краінамі дагэтуль не перавысіў абяцаныя гадоў пяць таму паўмільярда даляраў (у 2018-м тавараабарот склаў $72,3 млн).

Але гэта не перашкаджае кіраўніку краіны штогод адпачываць у гатэлях шэйхаў разам з сынамі і блізкім колам кіраўнікоў і бізнэсоўцаў. Шэйхі таксама не засталіся ў накладзе, атрымаўшы вялікія ўчасткі зямлі ў Беларусі.

Хто ж яшчэ, акрамя шэйха Абу-Дабі Мухамеда бен Заід аль-Нахаяна мог бы цёпла падзякаваць Аляксандру Лукашэнку за асаблівае стаўленне? Складзём невялікі спіс з тых, хто апошнім часам часцей за ўсё быў на слыху.

Браты Карычы

Уладальнікі Сербскай кампаніі «Dana Holdings» указамі Лукашэнкі атрымалі пад забудову некалькі ўчасткаў зямлі ў Менску, у тым ліку на Кастрычніцкай плошчы. Іх бізнэсу тэлеканал «Белсат» прысвяціў расследаванне, у якім, між іншым, сцвярджаецца наступнае:

— Кошты на жыллё ў Менску штучна завышаныя на дзясяткі адсоткаў. Гэтыя грошы ідуць не ў бюджэт, а ў схемы з прыкметамі карупцыі, якія вядуць да самых вярхоў улады.

Як паведамляў раней «Ежедневник», чысты прыбытак беларускіх кампаній холдынгу Astra Group, кантраляванага сербскімі мільянерамі Драгамірам і Багалюбам Карычамі, летась перавысіў 50 млн даляраў.

Сербскія сябры Лукашэнкі настолькі ўпэўнена сябе адчуваюць у Беларусі (як дома), што пачалі пазначаць тэрыторыю ўласным фамільным гербам.

Міхаіл Гуцарыеў

Расейскі алігарх Міхаіл Гуцарыеў вядомы не толькі тым, што Лукашэнка падарыў дарагі аўтамабіль. Нядаўна ён купіў менскую будаўнічую кампанію «Ю-строй».

У Менску бізнэсоўцу належыць гатэль Renaissance Minsk, пад Менскам — ангар для бізнэс-авіяцыі ў Нацыянальным аэрапорце «Менск» і сядзіба ў Краснасельскім.

Гуцарыеў мае віды на IT-сферу ў Беларусі, але адным з галоўных яго актываў з'яўляецца будаўніцтва Нежынскага ГАК, якое вядзе яго кампанія «Слаўкалій» у Любанскім раёне.

Завяршыць будаўніцтва комплексу магутнасцю 2 млн тон хларыду калію ў год плануецца ў 2020-м.

Кітайскія кампаніі

Кіраўнік Беларусі не раз рассыпаўся ў кампліментах у адрас кітайскіх улад, прапаноўваючы ім інвеставаць у нашу эканоміку. У выніку мы маем цэлы шэраг сумнеўных аб'ектаў - ад фабрыкі ў Шклове, да Светлагорскага ЦКК.