Bloomberg: Украіна атрымае $5 мільярдаў ад МВФ

Кіеў атрымае крэдыт на тры гады.

Украіна гатовая пагадзіцца на ўмовы Міжнароднага валютнага фонду (МВФ) паводле новага крэдыту на суму блізу $5 млрд, паведамляе агенцтва Bloomberg са спасылкай на тры крыніцы, знаёмыя з сітуацыяй, паведамляе РБК.

Новая праграма фінансавай дапамогі будзе ўяўляць сабой крэдыт па так званаму механізму пашыранага фінансавання, у адрозненне ад 14-месячнага рэзервовага пагаднення (Stand-by Arrangements, SBA) на $3,9 млрд, якое МВФ узгадніў з Кіевам у кастрычніку 2018 года. Паводле звестак крыніц агенцтва, Украіна атрымае крэдыт на тры гады. Цяпер перамовы па ўгодзе працягваюцца.

Паводле інфармацыі агенцтва, місія МВФ прыбыла ў Кіеў у верасні, каб абмеркаваць новую праграму. Пагадненне, верагодна, будзе ўключаць умовы для далейшых крокаў у барацьбе з карупцыяй ва Украіне, стрымліванні бюджэтнага дэфіцыту і лібералізацыі рынку сельскагаспадарчых зямель. Ва ўкраінскім урадзе спадзяюцца дасягнуць пагаднення з МВФ у гэтым месяцы і заключыць новую праграму да канца года, паведамляе агенцтва.

Мінулае пагадненне пра фінансавую дапамогу Украіне з МВФ было заключана ў 2018 годзе і замяняла больш ранняе, датаванае 2015 годам. Тады краіна не змагла цалкам выканаць умовы пагаднення, па якім яна павінна была правесці антыкарупцыйную рэформу, павысіць цэны на газ для насельніцтва і рэарганізаваць дзяржаўную фіскальную службу. У выніку замест $17 млрд Кіеў атрымаў $8,4 млрд, а пазней МВФ замарозіў раты.

Увосень 2018 года бакі дамовіліся пра кароткатэрміновую праграму па мадэлі SBA. З $5-6 млрд, на якія разлічвала Украіна, Кіеў атрымаў ад МВФ $3,8 млрд. 8 жніўня намеснік кіраўніка Нацбанка Украіны Дзмітрый Салагуб заявіў, што краіна мае патрэбу ў новай праграме дапамогі ад МВФ, і паведаміў пра намеры папрасіць у МВФ крэдыт на $5-10 млрд.