Як беларускія хакеісты феераць у кэмпах НХЛ

Галоўны ньюсмейкер апошніх дзён, натуральна, беларускі форвард «Вашынгтона».

За такое кароткае лета Аляксей Протас зрабіў многае, піша "Прэсбол". Спачатку ён быў задрафтаваны "сталічнікамі" ў трэцім раўндзе. Потым беларус ударна папрацаваў у лагеры развіцця "Кэпіталс", чым адразу ж заслужыў сабе трохгадовы кантракт пачаткоўца – далёка не ўсе, хто пайшоў на драфце не ў першым раўндзе, падпісваюць пагадненні так хутка. Пасля Аляксей праявіў сябе ў лагеры пачаткоўцаў, пераканаўшы трэнераў уключыць яго ў асноўны кэмп "Вашынгтона". Там беларускі грэнадзёр апынуўся амаль самым маладым і пры гэтым ледзь не самым габарытным у камандзе пры росце 198 см.

Гэта ўжо вялікі шлях, які Протас прайшоў вельмі хутка дзякуючы ўпартай працы. Але, як высветлілася, і гэта не ўсё. Беларус чакана быў уключаны ў ростар "Вашынгтона" на першы перадсезонны матч з "Чыкага". Чакана, бо, як правіла, у першых такіх гульнях трэнеры правяраюць найбліжэйшы і не вельмі рэзерв, пасля чаго адпраўляюць праспектаў развівацца ў свае юніёрскія або АХЛаўскія клубы. Але Аляксей і тут надумаў не змяншаць – ён стаў першай зоркай паядынку, закінуўшы шайбу і аддаўшы дзве выніковыя перадачы!

Каментатары адразу ж адзначылі выдатны хакейны IQ Пратасаў – толькі паглядзіце на пас не гледзячы, які ён выканаў у большасці. Да таго ж у плюс згулялі і ягоныя габарыты, калі беларус дзякуючы доўгім рукам дастаў шайбу на пятаку і разабраўся з брамнікам. Мінус Аляксея вядомы – не надта ўпэўненае катанне, што, у прынцыпе, уласціва гульцам ягоных габарытаў. Але і гэтая праблема развязальная: дырэктар "Вашынгтона" ў развіцці ўжо паабяцаў запусціць спецыяльную праграму, якая зробіць Аляксея мацнейшым. А вось што сказаў коўч "Кэпіталз" Тод Рырдэн пра Протас пасля гульні з "Чыкага".

"Проста малады хлопец з велічэзнымі габарытамі. Ён не заўсёды выглядае хуткім, але становіцца ўсё лепшым у гэтым кампаненце. Ён здольны быць эфектыўным пры гульні ў большасці, у тым ліку на пятаку. Ён вельмі спадабаўся мне на турніры пачаткоўцаў, асабліва ў першым матчы. Потым ён прайшоў вялікі шлях, каб з'явіцца тут і паказаць сапраўды моцную гульню. Ён цудоўны праспект з ростам пад два метры, у яго выдатныя рукі. Я рады, што ён тут, для яго гэта вялікі досвед, і ён прынёс нам шмат карысці.

Увогуле, ёсць не так шмат хакеістаў, якія з такімі габарытамі могуць добра катацца. Вы можаце паглядзець на Тома Уілсана – наколькі ён дадаў у гэтым кампаненце за апошнія гады. Я спадзяюся, Протас пройдзе той жа шлях. Не думаю, што Аляксей зможа валодаць такой самай хуткасцю: Уілсан усё ж унікальны гулец, які дзякуючы свайму катанню змог стаць гульцом асноўнага звяна. Але мне здаецца, у Аляксея ёсць выдатны хакейны нюх, мы прамацваем глебу з гэтым маладым гульцом. У любым выпадку, гэта выдатнае набыццё для нашай арганізацыі, нам варта падзякаваць скаўтам за тое, што яны адшукалі такога хакеіста".

А амерыканскі NBC уключыў Протаса ў топ-3 "сталічнікаў", што здзівілі ў першай перадсезоннай гульні. Што ж, Аляксей заслужыў сабе яшчэ адзін шанец. Гэтай ноччу паводле беларускага часу ён зноў выйдзе на лёд у форме "Вашынгтона". На гэты раз, у атачэнні суперзорак – Авечкіна, Кузняцова, Бэкстрэма, Арлова. Дарэчы, толькі два з тых, хто гуляў у першай сустрэчы, патрапілі ў склад на другі матч. Адзін з іх – беларус Аляксей Протас.

А што далей? Безумоўна, патрапіць у аснову "Вашынгтона" ўжо цяпер – гэта архіскладаная задача. Усе эксперты сыходзяцца ў меркаванні, што Протасу яшчэ як мінімум на сезон давядзецца вярнуцца ў юніёрскую лігу. Так, вы памятаеце, праз пагадненне паміж НХЛ і CHL маладыя хакеісты, што гуляюць за клубы Канадскай лігі, не могуць гуляць у АХЛ. Але гэта будзе потым. А цяпер – матч з "Сэнт-Луісам".

Максім Сушко – два матчы і перапісаны гол

Сушко сваю юніёрскую кар'еру ўжо скончыў. Другі сезон у "Оўэн-Саўнд" склаўся не так паспяхова, як першы. Зрэшты, у беларуса яшчэ два гады паводле кантракту пачаткоўца з "Філадэльфіяй" – і ўсё толькі ў ягоных руках. Нядзіўна, што Максім дабраўся да галоўнага кэмпа "лётчыкаў". Беларуса вызначылі ў групу "В", дзе ён трэніруецца ў тройцы з Кайлам Крыскуала і Міхаілам Вараб'ёвым – у абодвух, дарэчы, ужо ёсць некаторы досвед гульні ў НХЛ. У нядзелю яны згулялі міні-матч з тройкай Рэткліф – Фрост – Фарабі, і прэс-служба "лётчыкаў" адзначыла, што гэта было роўнае супрацьстаянне. Праўда, аўтары ў асноўным кажуць пра Вараб'ёва і Фроста, а прозвішча Сушко фігуруе пакуль толькі ў сухіх пратаколах.

Магчымасць выправіць гэта ў Максіма была ў дзвюх першых перадсезонных сустрэчах. У другой з іх – з "Айлендэрс" гэтай ноччу Сушко стаў суаўтарам гола. Ён экранаваў перад Томасам Грайсам у момант кідка Крыса Біграса. Спачатку гол запісалі менавіта на беларуса, аднак пазней, перагледзеўшы эпізод, суддзі на пратаколе ўсё ж пастанавілі, што Сушко не дакрануўся шайбы – Біграс закінуў без асістэнтаў. Нельга не адзначыць, што Максім стаў адным з толькі чатырох хакеістаў, што паўдзельнічалі ў абедзвюх перадсезонных сустрэчах.

Хутчэй за ўсё, новы сезон Сушко правядзе ў АХЛаўскім фарме "Філадэльфіі". І там будзе магчымасць сябе праявіць, карысць досведу таго ж Вараб'ёва, якога летась падымалі з АХЛ у НХЛ, перад вачыма.

Ягор Шаранговіч і Сцяпан Фалькоўскі

Для Шаранговіча гэта будзе другі прафесійны сезон у Паўночнай Амерыцы. У кэмп Ягор ехаў з аптымізмам і баявым настроем. "Мая галоўная мэта ў гэты момант – згуляць у камандзе НХЛ. Буду рабіць для гэтага ўсё магчымае і ад мяне залежнае, у першую чаргу прыслухоўваючыся да меркаванняў і рэкамендацый каманды, якая паверыла ў мяне і выбрала на драфце", – казаў 21-гадовы форвард летам, каментуючы цікавасць з боку менскага "Дынама".

"Нью-Джэрсі", у галоўным кэмпе якога Шаранговіч працуе, ужо правёў два перадсезонныя матчы. Але ў адрозненне ад "Філадэльфіі" і "Вашынгтона" "д'яблы" падзялілі склад на дзве часткі і згулялі два паядынкі амаль адначасова. Ягор трапіў у ростар на сустрэчу з "Бостанам", акрамя беларуса ў складзе былі першы нумар драфту Джэк Х'юз і пачаткоўцы каманды Пі-Кей Субан і Мікіта Гусеў. Шаранговіч згуляў амаль 10 хвілінаў у чацвёртай тройцы з Марыянам Студзенічам і Грэмам Кларкам, выканаў тры кідкі і зарабіў адзін малы штраф.

Добрая навіна – Ягор пазбег першага адсеву з лагеру "Нью-Джэрсі" – трэнеры адправілі трох праспектаў у юніёрскія каманды.

У Сцяпана Фалькоўскага застаўся апошні год паводле кантракту пачаткоўца. Калісьці абаронца-грэнадзёр падпісваў гэтае пагадненне з "Лос-Анджэлесам", цяпер правы на 22-гадовага беларуса належаць "Мінесоце". Сцяпан удзельнічае ў трэніровачным лагеры "Уайлд", да таго ж ён пазбег першага вялікага адсеву. Вось толькі ў склад на першы матч з "Далас" Фалькоўскі не трапіў. Ёсць верагоднасць, што ён згуляе гэтай ноччу з "Вініпегам" – прэс-служба "Мінесоты" анансавала, што ў гэтым спарынгу каманда згуляе ў маладзёвым складзе.

Хто ўжо не ў кэмпах?

Уладзіслаў Калячонак, задрафтаваны ў другім раўндзе, пакінуў лагер "Фларыды" ўжо ў першую хвалю адсеву. Зрэшты, самага галоўнага беларус дамогся – падпісаў трохгадовы кантракт пачаткоўца з "пантэрамі". Будучы сезон Улад правядзе ў "Флінце" ў юніёрскай АХЛ.

Сяргей Сапега працаваў у кэмпе "Таронта", але таксама не пазбег першага адсеву. У 19-гадовага экс-партнёра Протаса ў "Прынс-Альбертце" свой шлях – незадрафтаваны Сапега летам падпісаў кантракт з "Таронта Марліз" з АХЛ. Там і паспрабуе даказаць, што генмэнэджары НХЛаўскія клубаў дапусцілі памылку.