Затрыманыя падазраваныя ў дзёрзкім рабаванні менскай ювелірнай крамы «Карунд»
6- 4.09.2019, 14:02
- 19,253
Частку выкрадзеных упрыгажэнняў яны збылі ў Расеі.
Міліцыя ў Менску раскрыла справу аб рабаванні ювелірнай крамы «Карунд». Пра гэта паведамляе tut.by са спасылкай на МУС.
3 верасня міліцыя затрымала падазраваных паводле справы аб разбойным нападзе на ювелірную краму «Карунд» на вуліцы Кісялёва ў Менску.
- Цяпер ажыццяўляюцца следчыя дзеянні з іх удзелам. Па месцы жыхарства фігурантаў праведзеныя ператрусы. Таксама правяраецца дачыненне затрыманых да ўчынення іншых злачынстваў - яшчэ як мінімум трох разбойных нападаў на прыватныя домаўладання ў Менску, - адзначылі ў міліцыі.
Частку выкрадзенага знайшлі ў тайніку ў маці аднаго з падазраваных. Акрамя таго, былі канфіскаваныя пластыкавыя сцяжкі - такія ж выкарыстоўваліся, каб абясшкодзіць супрацоўніка «Карунда».
Пазней інфармацыю дапоўнілі ў Следчым камітэце. У прэс-службе структуры паведамілі, што падазраваным 36 і 37 гадоў. Частку выкрадзеных упрыгажэнняў яны збылі ў Расеі.
У СК таксама распавялі, што рабаўнікі вынеслі з крамы не толькі каштоўнасці, але і сэрвер, на якім былі запісы камер відэаназірання ў ювелірнай краме. Яго падазраваныя пазней выкінулі ў Свіслач, але яго ўдалося падняць са дна ракі.
Нагадаем, у суботу, 17 жніўня, аб 11.40 двое мужчын зайшлі ў ювелірную краму на Кісялёва, распылілі пярцовы газ, выкралі ўсе каштоўнасці з вітрыны і ўцяклі. Гэта было ўжо чацвёртае рабаванне крамы «Карунд».
Пасля здарэння была распачатая крымінальная справа на падставе ч.2 арт.207 (Разбой, учынены групай асоб).
Шкода, прычыненая краме, складае больш за мільён беларускіх рублёў.