Канстытуцыю Расеі перапісалі за чатыры дні

У працоўнай групе з 75 чалавек толькі сем з'яўляюцца юрыстамі.

Рабочая група для змянення Канстытуцыі, скліканая прэзідэнтам Расеі Уладзімірам Пуціным, заявіла, што падрыхтавала папраўкі да Асноўнага закона, якія закрануць не менш за 14 яго артыкулаў, паведамляе finanz.ru.

На распрацоўку канстытуцыйнай рэформы, якая абяцае стаць самай маштабнай за ўсю найноўшую гісторыю краіны, у рабочую групу з 75 чалавек, куды акрамя сенатараў, дэпутатаў і юрыстаў, увайшлі атаман расейскага казацтва Мікалай Далуда, піяніст Дзяніс Мацуеў і двухразовая алімпійская чэмпіёнка Алена Ісінбаева, сышло ўсяго чатыры дні (16, 17, 18 і 19 студзеня).

У сераду, 15 студзеня прэзідэнт анансаваў папраўкі ў пасланні Федэральнаму сходу, а ўжо ў панядзелак пад праектам рэформы стаялі подпісы кіраўніка канстытуцыйнага камітэта Дзярждумы Паўла Крашаніннікава, кіраўніка аналагічнага камітэта Савета Федэрацыі Андрэя Клішаса і дырэктара Інстытута заканадаўства і параўнальнага правазнаўства пры ўрадзе Таліі Хабрыевай.

У дакуменце, які цытуе РБК, прапануецца вызначыць ролю і статус Дзяржсавета, які «павінен мець самастойнае значэнне». Для гэтага прапануецца прыняць федэральны закон аб Дзяржсавеце, а ў Канстытуцыі - прапісаць прынцып яго фармавання і ключавыя пытанні яго статусу.

Таксама прапануецца пашырыць паўнамоцтвы парламента, скараціўшы паўнамоцтвы кіраўніка дзяржавы (палаты ў гэтым выпадку атрымаюць магчымасць зацвярджаць членаў урада). Пры гэтым за прэзідэнтам прапанавана пакінуць кантроль за дзейнасцю ўрада і кіраўніцтва ўзброенымі сіламі і праваахоўнікамі.

Аўтары паправак прапанавалі ўзмацніць патрабаванні да кандыдатаў на прэзідэнцкую пасаду і пашырыць паўнамоцтвы Канстытуцыйнага суда (згодна з дакументам, КС будзе правяраць прынятыя парламентам законы на канстытуцыйнасць).

Для гэтага спатрэбяцца змены артыкулаў 15, 75, 78, 81, 97, 14, 83, 102, 103, 110, 119, 125, 129, 132.

Законапраекты аб змене Канстытуцыі, хутчэй за ўсё, будуць унесеныя ў Дзярждуму ўжо ў лютым-сакавіку 2020 года, распавяла ТАСС крыніца ў Савеце Федэрацыі. Усерасейскае добраахвотнае галасаванне адбудзецца да 1 траўня, у адзін з выхадных дзён.

Паколькі змены не датычацца асноватворных артыкулаў Канстытуцыі, то «ў гэтым выпадку гаворка не можа ісці аб рэферэндуме і фактычна нават не мае на ўвазе якога-небудзь прыняцця шляхам галасавання», папярэдзіў 15 студзеня прэс-сакратар Крамля Дзмітрый Пяскоў. Анансаваны плебісцыт - гэта добрая воля прэзідэнта, які палічыў мэтазгодным параіцца з грамадзянамі, удакладніў ён.

У выніку рэформы Расею можа чакаць казахстанскі сцэнар, пры якім Пуцін саступіць сваю пасаду пераемніку, але фактычна застанецца адным з самых уплывовых людзей у краіне, заявіў Reuters блізкі да Крамля палітолаг Андрэй Калядзін.

«Ён (Пуцін) можа ўзначаліць Дзяржсавет, ён можа застацца ў якасці нацыянальнага лідара. На перыяд, калі пераемнік будзе здабываць плоць і кроў уплыву на грамадства і на замежнапалітычныя працэсы, неабходнае тое самае плячо, на якое можна абаперціся», - сказаў Калядзін, які раней займаўся ўнутранай палітыкай у адміністрацыі прэзідэнта РФ.

«Гэтая сістэма, якая, мажліва, дзіўная з пункту гледжання развітых дэмакратый і трывалых еўрапейскіх, у нашай краіне яна, магчыма, мае права на існаванне...каб не дапускаць таго хаосу, які дзеяўся ў 90-я гады», - патлумачыў ён.

Паколькі змены не датычацца асноватворных артыкулаў Канстытуцыі, то «ў гэтым выпадку гаворка не можа ісці аб рэферэндуме і фактычна нават не мае на ўвазе якога-небудзь прыняцця шляхам галасавання», папярэдзіў 15 студзеня прэс-сакратар Крамля Дзмітрый Пяскоў. Анансаваны плебісцыт - гэта добрая воля прэзідэнта, які палічыў мэтазгодным параіцца з грамадзянамі, удакладніў ён.