21 лютага 2020, Пятніца, 15:51
Засталося зусім крыху
Рубрыкі

Пуцін унёс у Дзярждуму законапраект аб змяненні Канстытуцыі РФ

15
Пуцін унёс у Дзярждуму законапраект аб змяненні Канстытуцыі РФ

Аб плане змяніць Канстытуцыю РФ Пуцін заявіў 15 студзеня.

Прэзідэнт Расеі Уладзімір Пуцін у панядзелак унёс у Дзярждуму праект закона аб змене Канстытуцыі, паведаміў прэс-сакратар кіраўніка дзяржавы Дзмітрый Пяскоў.

Са слоў Пяскова, прадстаўнікамі прэзідэнта пры разглядзе дакумента ў Дзярждуме прызначаныя сустаршыні рабочай групы ў падрыхтоўцы прапаноў аб унясенні паправак у Канстытуцыю - член Савета Федэрацыі Андрэй Клішас, кіраўнік думскага камітэта што да дзяржаўнага будаўніцтва і заканадаўства Павел Крашаніннікаў і дырэктарка Інстытута заканадаўства і параўнальнага правазнаўства Талія Хабрыева, паведамляе svoboda.org.

У змешчаным на сайце Дзярждумы дакуменце прапануецца вызначыць ролю і статус Дзяржсавета, які «павінен мець самастойнае значэнне». Для гэтага прапануецца прыняць федэральны закон аб Дзяржсавеце, а ў Канстытуцыі прапісаць прынцып яго фармавання і ключавыя пытанні яго статусу. Таксама аўтары паправак прапанавалі пашырыць паўнамоцтвы парламента, скараціўшы паўнамоцтвы прэзідэнта (палаты ў гэтым выпадку атрымаюць магчымасць зацвярджаць членаў урада). Пры гэтым за прэзідэнтам прапанавана пакінуць кантроль за дзейнасцю ўрада і кіраўніцтва ўзброенымі сіламі і праваахоўнымі органамі.

Дзярждума павінна атрымаць права зацвярджаць старшынь ўрада, віцэ-прэм'ераў і міністраў. Прэзідэнт пры гэтым будзе абавязаны іх зацвердзіць. Зацвярджаць усіх кіраўнікоў сілавых структур кіраўнік дзяржавы зможа толькі пры кансультацыі з Саветам Федэрацыі.

Законапраект прыбірае слова «запар» з артыкула Канстытуцыі аб дапушчальнай колькасці прэзідэнцкіх тэрмінаў: «Адна і тая ж асоба не можа займаць пасаду прэзідэнта Расейскай Федэрацыі больш за два тэрміны».

У Канстытуцыі прапануецца замацаваць мінімальную суму аплаты працы і індэксацыю пенсій. Акрамя гэтага прапануецца замацаваць прыярытэт асноўнага расейскага закона над міжнароднымі дамовамі. «У мэтах абароны дзяржаўнага суверэнітэту законапраектам прапануецца ўстанавіць, што пастановы міждзяржаўных органаў, прынятыя на падставе палажэнняў міжнародных дамоў Расейскай Федэрацыі ў тлумачэнні, якія прыводзяць да іх разыходжання з Канстытуцыяй Расейскай Федэрацыі, не падлягаюць выкананню ў Расейскай Федэрацыі», - гаворыцца ў тлумачальнай запісцы.

У законапраекце таксама прапісаныя патрабаванні да членаў парламента і суддзяў. Аўтары паправак прапанавалі ўзмацніць патрабаванні да кандыдатаў на прэзідэнцкую пасаду і пашырыць паўнамоцтвы Канстытуцыйнага суда (згодна з дакументам, КС будзе правяраць прынятыя парламентам законы на канстытуцыйнасць). Усяго прапанавана ўнесці змены ў 14 артыкулаў Канстытуцыі.

Аб плане змяніць Канстытуцыю Пуцін заявіў 15 студзеня. Са слоў прэзідэнта РФ, прапановы будуць вынесеныя на ўсенароднае галасаванне, якое, паводле інфармацыі РБК, можа адбыцца 12 красавіка.