Лідары крымска-татарскага народа абвесцілі пра Марш годнасці на Крым

Удзельнікі маршу маюць намер патрапіць на анэксаваны паўвостраў праз адміністрацыйную мяжу.

Старшыня Меджліса крымска-татарскага народа Рэфат Чубараў анансаваў правядзенне 2 траўня акцыі негвалтоўнага супраціву "Свет – супраць гвалту і акупацыі. Марш годнасці», падчас якой актывісты маюць намер патрапіць у анэксаваны Крым праз адміністрацыйную мяжу. Расейскія ўлады Крыма адрэагавалі на гэта пагрозамі. Што вядома на гэты момант пра запланаваную акцыю – у матэрыяле Крым.Реалии.

Рэфат Чубараў адзначыў, што ў першых шэрагах будуць ісці чальцы Меджліса, народныя дэпутаты. Арганізатары «Маршу годнасці» плануюць таксама запрасіць да ўдзелу прадстаўнікоў міжнародных арганізацый. Чубараў не выключае, што магчымы сілавы варыянт прарыву на анэксаваны паўвостраў.

«Расея спрабуе ўсімі сваімі магчымасцямі выціснуць крымскіх татараў з іх зямлі. Гэта рэальная пагроза існаванню крымскіх татараў, магчыма, упершыню з часоў дэпартацыі ў 1944 годзе», – заявіў палітык.

У каментары Крым.Реалии Рэфат Чубараў паведаміў, што анансаваны на 2 траўня марш на анэксаваны Крым не патрабуе згоды ўкраінскіх уладаў, паколькі, як сцвярджае Чубараў, акцыя з'яўляецца законнай.

«Наша пазіцыя была публічнай, як ініцыятыва, агучаная ў снежні 2019 года. Тады мы яшчэ не называлі дату, а цяпер яна названая. Пакуль рэакцыі органаў улады няма. Гэта выключна наша акцыя. І ў адпаведнасці з украінскім заканадаўствам згода на тыя ці іншыя законныя акцыі не патрабуецца», – адзначыў Чубараў, дадаўшы, што арганізатары пакуль не раскрываюць дэталяў акцыі.

У той самы час, кіраўнік Меджліса крымска-татарскага народа паведаміў, што арганізатары маршу на Крым «будуць старацца» ўзгадняць свае дзеянні з украінскімі ўладамі.

«Мы не будзем пераступаць узровень сваіх правоў у адпаведнасці з заканадаўствам Украіны. Мы будзем старацца нашым штабам усе крокі ажыццяўлення гэтай акцыі ўзгадняць з адпаведнымі службамі. У нас няма намеру, каб нейкім чынам ускладніць дзейнасць дзяржаўных украінскіх структураў. Або, крый Бог, ускладніць узаемаадносіны ўкраінскай дзяржавы са сваімі партнёрамі», – сказаў Чубараў.

У той самы час, намеснік старшыні Меджліса крымска-татарскага народа Ільмі Умераў выказаў меркаванне, што ўзгадненне дзеянняў «не абавязковае».

«Я думаю, што няма неабходнасці ўзгадняць (марш – КР) з украінскай памежнай службай, таму што гэта тэрыторыя Украіны, мы ідзем па сваёй тэрыторыі», – сказаў Умераў.

У Дзяржпамежслужбе Украіны паведамілі Крым.Реалии, што ва ўстановы няма падставаў для перашкоды ўдзельнікам анансаванага на 2 траўня маршу на Крым.

«Усё павінны прайсці адпаведнае афармленне ў рамках дзейнага заканадаўства. Заканадаўствам дакладна вызначаны парадак перасячэння адміністрацыйнай мяжы з акупаваным Крымам. Перашкаджаць – няма падставаў», – паведаміў кіраўнік аддзела ў пытаннях узаемадзеяння ўкраінскай установы Андрэй Дземчанка.

Рэакцыя Аксёнава і Паклонскай

Падкантрольны Расеі «кіраўнік» Крыма Сяргей Аксёнаў назваў правакацыяй заяву Рэфата Чубарава пра запланаваны марш на Крым. Паводле словаў Аксёнава, удзельнікаў мерапрыемства чакае «жорсткі адпор».

«Калі справа сапраўды дойдзе да спробаў незаконнага перасячэння мяжы, да спробаў уварвання на расейскую тэрыторыю, то такія дзеянні, безумоўна, будуць спыняцца жорстка і ў адпаведнасці з законам. Украінскай уладзе варта задумацца пра наступствы правакацыі», – напісаў Аксёнаў у Фэйсбуку.

Экс-пракурор анэксаванага Крыма, цяпер дэпутат Дзярждумы Расеі Наталля Паклонская таксама адрэагавала на анонс Чубарава, заявіўшы, што ўдзельнікаў маршу ў Крыме будуць чакаць аўтазакі расейскіх сілавікоў.

«Ну, мы вас будзем чакаць. І пасля “вялікага” паходу на Крым дапаможам зладзіць аўтапрабег па паўвостраве. Для гэтага нават вылучым святочныя аўтазакі», – напісала Паклонская на сваёй старонцы ў Фэйсбуку.

«Крымскіх татараў не запужаць»

Лідар крымска-татарскага народа, дэпутат Вярхоўнай Рады Украіны Мустафа Джамілеў, каментуючы заяву Наталлі Паклонскай, заявіў Крым.Реалии, што «крымскіх татараў не запужаць» аўтазакамі.

«Бяспеку ніхто не можа гарантаваць, таму што мы маем справу з бандыцкім дзяржавай. Аўтазакі для крымскіх татараў – справа звыклая, таму нас гэтым не напалохаеш», – сказаў Джамілеў.

Лідар крымска-татарскага народа паведаміў, што мае намер удзельнічаць у маршы на анэксаваны Крым 2 траўня, прычым ісці збіраецца ў першых шэрагах шэсця. Пры гэтым ён не выключае сілавых дзеянняў з боку Расеі.

«Якая будзе рэакцыя Расеі? Тут мы разглядаем некалькі варыянтаў. Таму наперад мы пашлем тых, каго не шкада. А не шкада тых, каму ўжо больш за 73 гады (маецца на ўвазе сам 76-гадовы Мустафа Джамілеў – КР). Чаму 73? Таму што ў нас 73 гады – гэта «пражыткавы мінімум», – сказаў Джамілеў.

Кіраўнік Меджліса крымска-татарскага народа Рэфат Чубараў у каментары Крым.Реалии назваў «істэрыяй» рэакцыю расейскіх уладаў Крыма адносна запланаванага маршу.

«Тыя, хто захопліваў Крым, зыходзяць з таго, што гэта не наша зямля. Адпаведна ў іх не тое, што непрыманне, а яны будуць заклікаць Маскву, каб Масква ўжыла найбольш жорсткія захады для ўціску», – мяркуе Чубараў.

6 снежня 2019 года Рэфат Чубараў анансаваў падрыхтоўку і правядзенне шэсця з мацерыковай часткі Украіны ў анэксаваны Расеяй Крым. Чубараў паведаміў, што ўжо створаны штаб, склад якога назавуць пасля шэрагу кансультацый.