Урад Косава ўхваліў акт Магніцкага
1- 29.01.2020, 18:48
- 9,760
Мэта акта - караць грубых парушальнікаў правоў чалавека.
Урад Косава, які сыходзіць у адстаўку, у сераду ўхваліў так званы акт Магніцкага, мэта якога - караць грубых парушальнікаў правоў чалавека.
Пра гэта паведамляе "Еўрапейская праўда" са спасылкай на Balkan Insight.
"Сёння я ганаруся тым, што ўрад Косава прыняў косаўскі акт Магніцкага, які карае замежных чыноўнікаў, што маюць дачыненне да парушэнняў правоў чалавека ва ўсякім пункце свету", - заявіў у Twitter міністр замежных спраў Беджэт Пацолі.
Косава сцвярджае, што гэта важны крок ва ўзгадненні ягонай замежнай палітыкі з палітыкай заходніх партнёраў.
Так званы акт Магніцкага ўпершыню быў ухвалены ў ЗША былым прэзідэнтам Баракам Абамам у снежні 2012 года. Ён забараніў 18 расейскім чыноўнікам і бізнэсоўцам уезд у ЗША і выкарыстанне банкаўскай сістэмы, а іх актывы былі замарожаныя.
Пазней, у 2016 годзе, закон быў пашыраны і цяпер распаўсюджваецца больш чым на 40 парушальнікаў правоў чалавека ва ўсім свеце.
Закон названы ў гонар Сяргея Магніцкага, расейскага адваката і аўдытара, які памёр у расейскай турме ў нечалавечых умовах. У 2008 годзе Магніцкі расследаваў сетку падатковага махлярства і хабарніцтва, у якую былі ўцягнутыя 23 кампаніі і 230 млн даляраў, звязаных з прыватнымі асобамі, блізкімі да расейскага ўрада.