У Нямеччыне з нечаканых прычын даражэе піва

Пра падвышэнне коштаў заявілі найбуйнейшыя піваварныя канцэрны.

Немцам давядзецца раскашэліцца: найбуйнейшы ў Нямеччыне піваварны холдынг Radeberger, заводы якога вырабляюць такія маркі піва, як Jever, Berliner Pilsner, Schlösser Alt, Freiberger, добра вядомыя таксама ў Расеі і Украіне, заявіў, што падвышае кошты бочкавага піва. Падаражэнне чакаецца ў пачатку сакавіка, але на колькі канкрэтна паднімуцца кошты, канцэрн пакуль не паведамляе. Экспэрты кажуць пра 4-5 адсоткаў. Гэта як быццам трохі, але трэба ўлічваць, колькі піва п'юць немцы і тое, што прыкладна 20 адсоткаў усяго выпітага імі піва прыпадае менавіта на бочкавае, паведамляе dw.com.

Экалогія супраць піва?

Неабходнасць падвышэння канцэрн тлумачыць ростам сабекошту прадукцыі і тым, што выдаткі ўжо не атрымліваецца кампенсаваць за кошт унутраных рэзерваў. Прычыны падаражання - так бы мовіць, экалагічнага характару. Гаворка ідзе пра рост выдаткаў на электраэнэргію і лагістыку (на транспартныя выдаткі), а таксама аб неабходных інвестыцыях на шматабаротную вытворчасць. Акрамя таго, пастаянна падвышаюцца заробкі, і трэба ўлічыць таксама, што ячмень, які з'яўляецца галоўнай "сыравінай" для нямецкага піва, даражэе ўжо цягам некалькіх гадоў.

У нямецкіх піўніцах куфаль бочкавага піва можа каштаваць і 50 цэнтаў, і 5 еўраў: усё залежыць ад месца, часу і, вядома, гатунку піва. У сярэднім літр бочкавага піва каштуе ў Нямеччыне прыкладна 2 еўры. Паводле нямецкіх мерак гэта няшмат. Ды і ў еўрапейскім параўнанні нямецкі кошт - вельмі сярэдні. У Турцыі і на Кіпры, напрыклад, бочкавае піва ў паўтара разы даражэйшае. Праўда, скажам, у Балгарыі - амаль удвая танней. Але гаворка ідзе толькі аб чыстых лічбах, якасць піва тут не ўлічваецца.

Пра тое, што плануецца падвысіць кошты на бочкавае піва, заявілі яшчэ некалькі піваварных заводаў і фірмаў. Гэта зробіць Krombacher, дзе выпускаецца самае папулярнае ў Нямеччыне піва - Krombacher Pils. Такія ж планы - у бровары Veltins. Затое аматары рэйнскага карнавалу могуць уздыхнуць з палёгкай: кошты на "кёльш" (асаблівае кёльнскае піва) не будуць падвышаныя.

У Нямеччыне на душу насельніцтва сёння выпіваецца прыкладна 100 літраў піва на год. Сорак гадоў таму кожны немец выпіваў значна больш: у сярэднім 140 літраў на год.