Збіты ўладальнік кветкавай крамы разам з сям'ёй пакінуў Беларусь
32- 18.10.2020, 19:01
- 60,646
Максім Харошын паабяцаў вярнуцца ў краіну пасля рэгабілітацыі.
Збіты ўладальнік кветкавай крамы Максім Харошын разам з сям'ёй пакінуў Беларусь. Максім запісаў відэа, у якім апавядае, што, хоць гэта было і не проста, ён знаходзіцца на рэгабілітацыі ў адной з краін Балтыі і мерыцца вярнуцца.
"Вялікі дзякуй за ўсю тую дапамогу, якую вы далі маёй сям'і. Для мяне гэта вельмі важна. Я б зрабіў тое ж самае для вас, і дакладна яшчэ зраблю. Я канечне вярнуся, буду прывозіць букеты і буду вас радаваць. Бо мы дакладна пераможам», - сказаў Максім на відэа. А ў допісе да роліка дадаў:
«Я толькі цяпер выдыхнуў, абняў сына, жонку і расплакаўся. Ад былога страху і ад той падтрымкі, якую я атрымаў ад вас».
Максіма Харошына затрымалі невядомыя ў балаклавах у двары ягонага дома. Праз дзве гадзіны пасля затрымання з'явілася шакавальнае відэа, на якім медыкі выводзяць Максіма з Першамайскага РУУС. У шпіталі лекары зафіксавалі у Максіма апухласць вантробаў, апухласць машні, падазрэнне на пералом цыбалкі, пералом носа, чэрапна-мазгавую ды іншыя траўмы.
Падчас пратэставых акцый Максім дарыў мінакам кветкі.