Фрыстайлістка Аляксандра Раманоўская: Людзей нельга падмануць

Вядомая беларуская спартоўка падтрымала пратэсты.

Пра гэта чэмпіёнка свету ў фрыстайле Аляксандра Раманоўская, якая стала найлепшай спартоўкай Беларусі ў 2019 годзе, расказала ў інтэрв'ю YouTube-канале «Жыццё-маліна».

- Па-мойму, гэта здарылася, калі арыштавалі ўсіх патэнцыйных кандыдатаў. Сам факт гэтай несумленнасці мяне моцна абурыў. Напісала, выплюхнула і пайшла займацца сваімі справамі. Сябры потым пішуць: «Нічога сабе ты дала». Першая думка: «Усё, мяне звольнілі». Пачала думаць, што мне трэба рабіць далей. У групе спартоўцаў, калі напісалі, што будзе сустрэча з міністрам, спытала: «Мне свой крыж несці ці мяне на міністэрскім укрыжуюць?»

На наступны дзень быў сход, але мяне ніхто не лаяў. Да нас тады міністр спорту прыязджаў і правёў лекцыю, што ў нас усё добра. Але канкрэтна да мяне не звяртаўся, хоць і пару разоў паглядзеў у мой бок. Было бачна, што ён у курсе.

Раманоўская таксама заявіла, што не адчувае ціску, хоць і разумее, што, напэўна, пазбавіцца імянной стыпендыі.

- Пакуль ціску не адчуваю. Думаю, гэта праз тое, што я не адна такая ў камандзе. Ёсць Мікалай Іванавіч Казека. Здаецца, увесь ціск ён прымае на сябе. Толькі дзякуючы таму, што ён прыняў жорсткую пазіцыю, да мяне пакуль што не даходзіла. Гэта я мяркую. Я гатовая да таго, што ціск можа быць. Разумею аб наступствах, калі кажу нешта.

Не магу ўявіць, як бы сябе адчувала, калі б пайшла насуперак уласнаму сумленню і змаўчала. Ці даставіла б мне задавальненне тады перамагчы на спаборніцтвах, калі б ведала, што я адсядзелася, калі магла хоць нешта зрабіць? Я разумею, што калі сумленне нячыстае, то чаго б ты ні дасягаў, цяжкавата з гэтым жыць. Не шкадую аб тым, які шлях абрала.

Чым я незадаволеная? Хлуснёй. Нельга людзей падмануць нахабна. Нават не ўтойваць відавочных рэчаў. Нельга людзей падмануць, пабіць і яшчэ абазваць. І спадзявацца, што яны не будуць абурацца і будуць далей з гэтым жыць. Гэта як плюхнуць чалавеку ў твар вядро памыяў і каб ён прыняў, адвярнуўся і прадоўжыў з гэтым жыць. Тым больш, такой вялікай колькасці людзей.