Расейская журналістка Ірына Славіна падпаліла сябе каля будынка МУС

Журналістка памерла.

Галоўная рэдактарка ніжагародскага выдання Koza Press Ірына Славіна ў пятніцу падпаліла сябе ля будынка УУС Ніжагародскай вобласці ў Ніжнім Ноўгарадзе. Як паведамляе Baza і абласны штаб Навальнага, яна памерла на месцы.

Раней у пятніцу Славіна напісала ў Фэйсбуку: «У маёй смерці прашу вінаваціць Расейскую Федэрацыю».

У МУС пацвердзілі факт самаспалення жанчыны ля будынка міністэрства, аднак афіцыйна не паведамляецца, што загінулая - Славіна. Следчы камітэт пачаў даследчую праверку, паведамляе svoboda.org.

У чацвер у Славінай прайшоў ператрус паводле крымінальнай справы, распачатай супраць прадпрымальніка Міхаіла Ёселевіча. Яго абвінавачваюць у ажыццяўленні на тэрыторыі Расеі дзейнасці непажаданай арганізацыі - у сувязі з тым, што ў прыналежным яму памяшканні, паводле версіі следства, ладзілі лекцыі актывісты руху «Адкрытая Расія» (прадстаўнікі гэтага руху сцвярджаюць, што яны не маюць дачынення да аднайменных брытанскіх структур, уключаных у Расеі ў спіс непажаданых). У Славінай падчас ператрусу канфіскавалі электронныя прылады, асабістыя рэчы, дакументы, нататнікі з запісамі і гэтак далей. «Забралі, што знайшлі - усе флэшкі, мой ноўтбук, ноўтбук дачкі, кампутар, тэлефоны - не толькі мой, але і мужа, - стос нататнікаў, на якіх я крэмзала падчас прэс-канферэнцый. Я засталася без сродкаў вытворчасці», - напісала напярэдадні Славіна.

Улетку 2019 года Славіну ўжо прызнавалі вінаватай ва ўдзеле ў дзейнасці непажаданай арганізацыі за рэпост уласных навін аб гэтых лекцыях. Тады суд аштрафаваў яе паводле адміністрацыйнага артыкула на 5 тысяч рублёў.

У сакавіку 2019 года суд у Ніжнім Ноўгарадзе аштрафаваў Ірыну Славіна на 20 тысяч рублёў, прызнаўшы яе вінаватай у арганізацыі недапасаванага шэсця памяці Барыса Нямцова. 24 лютага Славіна прайшла Вялікай Пакроўскай вуліцай у цэнтры горада з партрэтам палітыка. Разам з ёй ішлі яшчэ некалькі дзясяткаў чалавек, якія затым усклалі на Тэатральнай плошчы горада кветкі ў памяць аб Нямцове.

У кастрычніку 2019 года Ірыну Славіну аштрафавалі ўжо на 70 тысяч рублёў за «непавагу да ўлады і грамадства» пасля таго, як яна ў сваім фэйсбуку жартам прапанавала перайменаваць горад Шахунью, памяняўшы некалькі літар у яго назве месцамі. Тады Славіну абурыла ўстаноўка ў Шахуньі мемарыяльнай дошкі памяці Сталіна да 140-годдзя з дня яго нараджэння.

«Маё СМІ складаецца з аднаго чалавека - гэта я. Мне даводзіцца і пісаць навіны, і быць аператарам, і адказчыкам у судах, і даваць падатковую справаздачнасць, запаўняць стужку. Гэта значыць, ва ўсім я адна. Акрамя таго, паездка ў Шахунью каштуе грошай, а бюджэт майго СМІ вельмі сціплы, і я яшчэ раз паўтаруся: ён жыве на ахвяраванні. я проста не магу сабе дазволіць гэтую паездку. Мяне натхняе, што тут жа ў маю падтрымку ўключыліся два юрысты, цалкам бясплатна дапамагаюць мне, адзін ад «Агоры», а другі ад «Апалогіі пратэсту». Гэта вялікі гонар для мяне, што мне дапамагаюць такія людзі. І я ўпэўненая, што з маёй справай яны рана ці позна дойдуць да ЕСПЧ», - распавядала Славіна пасля гэтага выпадку ў інтэрв'ю «Радыё Свабода».

Нарэшце, у чэрвені 2020 года Ірыну Славіну абвінавацілі ў распаўсюдзе «фэйкавых навін». Гэта адбылося пасля таго, як яе выданне паведаміла, што адзін з кіраўнікоў кстоўскай акадэміі самба кантактаваў з дзясяткамі людзей, у тым ліку з наведвальнікамі школы, ведаючы, што ён заражаны каранавірусам. Гэтым разам суд аштрафаваў Славіну на 65 тысяч рублёў.

«Пакуль мне хочацца проста памерці. Таму што ч.9 арт.13.15 КоАП РФ, адпаведна з якой мяне абвінавацілі, напісаная, каб забіваць журналістаў і СМІ. Фінансава. Але душэўны боль ад несправядлівасці такі моцны, што цяжка ўжо і фізічна», - напісала тады Славіна у Фэйсбуку.