Аліеў назваў умову спынення баявых дзеянняў у Карабаху

Паводле словаў прэзідэнтa Азербайджана, у спрэчным рэгіёне «з'явілася новая рэальнасць».

Баку гатовы спыніць баявыя дзеянні ў Нагорным Карабаху ў выпадку спынення агню з армянскага боку, заявіў прэзідэнт Азербайджана Ільхам Аліеў у інтэрв'ю французскай газеце Figaro (пераклад – ria.ru).

"Мы гатовыя спыніць (баявыя дзеянні. – Заўвага. Рэд.) сёння. Я ўжо казаў пра гэта падчас перамоваў у Маскве 10 кастрычніка. Трэба ўсяго толькі, каб Арменія спыніла агонь. А потым менавіта дыпламаты павінны дзейнічаць", – сказаў кіраўнік дзяржавы.

Ён растлумачыў, што Арменія, як мяркуе азербайджанскі бок, павінна прызнаць прынцыпы ўрэгулявання канфлікту, вызначаныя сустаршынямі Менскай групы АБСЕ – Расеяй, Францыяй і ЗША, – якія Баку, паводле ягоных словаў, ужо прыняў.

"Пасля гэтага мы вернемся за стол перамоваў", – паабяцаў Аліеў.

Азербайджанскі лідар таксама выступіў з сцвярджэннем, што Нікол Пашынян пасля прыходу на пасаду прэм'ера Арменіі "разбурыў мірны працэс сваімі падбухторніцкімі заявамі і ваеннымі правакацыямі".

Паводле словаў Аліева, статус-кво і старая лінія судотыку больш не існуюць; з'явілася новая рэальнасць.

Аліеў дадаў, што баявыя дзеянні ў Нагорным Карабаху 27 верасня пачаў не Азербайджан, а Арменія. Ён назваў ваенны адказ Баку сувымерным і заявіў, што ягоная краіна вызваляла і будзе вызваляць "тэрыторыі, якія на міжнародным узроўні прызнаюцца (тэрыторыямі. – Заўвага рэд.) Азербайджана".

"Наша пазіцыя ясная: калі армяне не спыняць агонь, мы прадоўжым вызваляць нашы землі", – сказаў прэзідэнт.

Адказваючы на пытанне, ці не баіцца ён, што ўмяшанне Турцыі і прыбыццё праз яе ў Карабах баевікоў з Сірыі можа ператварыць лакальны канфлікт ў рэгіянальны, Аліеў запэўніў, што Турцыя не ўдзельнічае ў баявых дзеяннях.

"Сапраўды, у першыя гадзіны армянскага наступу прэзідэнт Турцыі (Рэджэп Эрдаган. – Заўвага рэд.) выказаў выразную палітычную падтрымку на нашу карысць. Але ён заклікае толькі да няўхільнага выканання чатырох рэзалюцый Рады Бяспекі ААН, якія патрабуюць ад Арменіі сысці з азербайджанскіх тэрыторый, якія яна займае", – сказаў кіраўнік дзяржавы, падкрэсліўшы, што на тэрыторыі Азербайджана "няма ні аднаго замежнага байца".

Калі казаць пра будучыню Карабаха, Аліеў паведаміў, што бачыць яго як "расквітнелую і бяспечную частку Азербайджана, дзе азербайджанцы і армяне будуць жыць у гармоніі, міры і годных умовах".

Сітуацыя ў Карабаху

Сітуацыя ў рэгіёне абвастрылася 27 верасня. Баку і Ерэван абменьваюцца ўзаемнымі абвінавачваннямі. Усе ўдзельнікі абвесцілі поўную або частковую мабілізацыю. Ёсць ахвяры сярод мірнага насельніцтва.

Канфлікт ускладняецца тым, што Баку актыўна падтрымлівае Турцыя (чалец NATO). У сваю чаргу Арменія ўваходзіць у АДКБ. Сусветная супольнасць заклікае бакі да стрыманасці.

У ноч з 9 на 10 кастрычніка ў Маскве прайшлі кансультацыі міністраў замежных справаў Расеі, Арменіі і Азербайджана. У расейскую сталіцу дыпламатаў запрасіў прэзідэнт Уладзімір Пуцін. Паводле вынікаў сустрэчы бакі дамовіліся пра спыненне агню. Рэжым перамір'я пачне дзеянне а 12-й 10 кастрычніка для абмену палоннымі і целамі загінулых пры пасярэдніцтве Чырвонага Крыжа. Аднак амаль адразу бакі пачалі вінаваціць адзін аднаго ў парушэнні дамоўленасці.

Другую спробу арганізаваць гуманітарнае перамір'е Баку і Ерэван распачалі ў ноч на 18 кастрычніка, але яна таксама сарвалася.