Нацбанк забраў валюту з фінансавага сектара

У верасні рэгулятар пайшоў на беспрэцэдэнтныя захады.

Улады апублікавалі статыстыку аб рэзервах і ўнутраным валютным рынку. У гэтых звестках жорсткі дэфіцыт пазітыву для чыноўнікаў, пішуць banki24.by.

Золатавалютныя рэзервы (ЗВР) за верасень зменшыліся на 136,4 млн USD. Пры гэтым з 1 верасня да 1 кастрычніка кошт манетарнага золата ў ЗВР скараціўся на 113,2 млн USD. У пераліку на працэнты кошт золата на рахунках Нацбанка зменшыўся на 3,6%.

Паралельна каціроўкі золата на сусветным рынку ўпалі на тыя ж 3,6%. Гэта сведчыць аб тым, што фізічная колькасць золата ў рэзервах не скарацілася. Праўда, для Нацбанка гэта слабае суцяшэнне: калі раней рост ЗВР падсілкоўваў рост каціроўкі жоўтага металу, то цяпер стан рынка гуляе супраць НБРБ.

Сума валюты ўнутры ЗВР у розных формах знізілася на 21,2 млн USD. Менавіта за кошт валютнай часткі рэзерваў Нацбанк праводзіць інтэрвенцыі на біржавым рынку.

Са звестак рэгулятара, у верасні Мінфін выплаціў валютныя абавязанні на 299,7 млн USD. Адначасова Нацбанк закупляўся валютай на біржы. Тое, што валютныя рэзервы крыху скараціліся, сведчыць аб абмежаваным аб'ёме пакупак Нацбанка.

Паводле нашых ацэнак, такія пакупкі былі загадзя ніжэйшымі за 300 млн USD. У параўнанні з інтэрвенцыямі на 1 млрд USD у жніўні гэта каціныя слёзы.

У цэлым за тры чвэрці года Нацбанк усё яшчэ знаходзіцца ў велізарным мінусе паводле сальда аперацый на біржавым рынку. З высокай верагоднасцю НБРБ «зліў» на чыстай аснове ад 2 млрд USD.

Гэта значыць, калі б рэгулятар менш актыўна ўдзельнічаў у згладжванні ваганняў курсу, ЗВР маглі быць істотна вышэйшымі, чым цяпер. З іншага боку, больш высокі курс аўтаматычна задае ўсплёск інфляцыйных чаканняў. А гэта, у сваю чаргу, бурыць працу Нацбанка ў стрымліванні інфляцыі.

У каго Нацбанк браў валюту ў верасні?

Статыстыка ўнутранага рынку кажа, што рэальнай крыніцай мог быць толькі банкаўскі сектар. Рэч у тым, што прадпрыемствы-рэзідэнты прадалі на біржы менш 0,3 млн USD, а насельніцтва выкупіла валюту на 54,5 млн USD.

А вось банкі-рэзідэнты, Банк развіцця і іншыя фінансавыя арганізацыі прадалі праз біржу аж 271,8 млн USD. Хутчэй за ўсё, практычна ўсю гэтую валюту перахапіў Нацбанк.

Чаму фінансавы сектар кінуўся здаваць валюту?

Таму што рэгулятар абмежаваў выдачу рублёвай ліквіднасці і банкі пачалі выходзіць з доўгай пазіцыі па валюце. Гэта было патрэбна, каб выканаць рэзервовыя патрабаванні - фонд абавязковых рэзерваў фармуецца выключна ў «зайчыках».

Агулам, карціна не вельмі прывабная для Нацбанка. Валюту атрымалася «выбіць» толькі з банкаў, ды і тое пад націскам. Крэдыт Еўразійскага фонду стабілізацыі і развіцця (500 млн USD) амаль цалкам сыдзе на закрыццё дзіркі ад аплаты газавай завінавачанасці. Расейскія дзяржаўныя крэдыты намінаваныя ў рублях РФ, імі ЗВР не папоўніць.

НБРБ застаецца чакаць, што нейкая колькасць валюты атрымаецца «вытрасці» з экспарцёраў у перыяд выплаты квартальных падаткаў (у другой палове кастрычніка).

Да таго ж, кіраўніцтву Нацбанка трэба спадзявацца, што ў дачыненні да Расеі не ўвядуць сур'ёзных санкцый за атручванне Навальнага. Інакш курс расейскага, а за ім і беларускага рубля сыдзе ў стратасферу.