У Аўстраліі ўпершыню з чэрвеня не выявілі ніводнага новага выпадку заражэння каранавірусам
- 1.11.2020, 16:48
- 13,080
Пра гэта паведаміў міністр аховы здароўя Аўстраліі.
Медыцынскія службы Аўстраліі ўпершыню з 9 чэрвеня не зарэгістравалі ўчора новых выпадкаў інфікавання каранавірусам COVID-19, заявіў у нядзелю міністр аховы здароўя краіны Грэг Хант, паведамляе interfax.by.
"Сёння нуль выпадкаў перадачы (віруса - заўв.) - па ўсёй Аўстраліі. Гэта першы з 9 чэрвеня дзень з нулявым узроўнем інфікавання", - напісаў ён у твітары.
"Дзякуй усім вам, супрацоўнікам сферы грамадскай аховы здароўя, і найперш - народу Аўстраліі", - дадаў ён.
Заходнія СМІ ўдакладняюць, што невялікая колькасць выпадкаў захворвання яшчэ фіксуецца ў каранцінных установах, дзе знаходзяцца жыхары, якія прыбылі з-за мяжы Аўстраліі. На сёння ў краіне адзначаюцца менш за 200 актыўных выпадкаў захворвання.
Між тым, у другім па велічыні горадзе Аўстраліі Мельбурне, дзе ўлады раней уводзілі карантын, скасавалі распараджэнне для жыхароў заставацца дома. Зноў адкрытыя крамы, бары і рэстарацыі.
Цяпер аўстралійскія ўлады канцэнтруюць высілкі на вяртанні дадому аўстралійцаў, якія затрымаліся праз пандэмію за мяжой, на ўз'яднанне сем'яў, разлучаных эпідэміяй, і на аднаўленні вольнага перамяшчэння ўнутры краіны.
Паводле звестак статыстычнага сайта Worldometers, усяго ў Аўстраліі за час пандэміі дыягнаставалі 27 595 выпадкаў заражэння каранавірусам. 907 інфікаваных памерлі, а 25 336 чалавек паправіліся.