«Ъ»: Перад Лаўровым пастаўленая задача вярнуць да розуму Лукашэнку

Паводзіны дыктатара ўсё больш бянтэжаць Крэмль.

ЕЗ ухваліў (трэці пакет санкцый супраць рэжыму Лукашэнкі). Мяркуецца, што гэтым разам абмежавальныя меры закрануць як чыноўнікаў, так і дзяржпрадпрыемствы і бізнэсмэнаў, якія фінансуюць урад Лукашэнкі. Аналагічныя захады супраць афіцыйнага Менска рыхтуюцца і ў ЗША.

На гэтым фоне на наступны тыдзень анансаваны візіт у Беларусь кіраўніка расейскага МЗС Сяргея Лаўрова. Палітычны аглядальнік выдання «Камерсант» Дзмітрый Дрызэ мяркуе, што новыя санкцыі супраць Лукашэнкі наўпрост закранаюць расейскія інтарэсы.

Кіраўнікі МЗС краінаў ЕЗ падчас відэаканферэнцыі дамовіліся падрыхтаваць новы – трэці – пакет санкцый супраць Беларусі. Меркавана, ён будзе ўведзены праз некалькі тыдняў. Размова пойдзе пра персанальныя захады супраць беларускіх чыноўнікаў, а таксама прадпрымальнікаў і кампаній, якія фінансуюць рэжым.

Гучалі таксама прапановы ад Польшчы і Літвы пакараць суб'екты Еўразвязу, якія супрацоўнічаюць з афіцыйным Менскам. Мяркуецца, што гэта будзе вельмі адчувальны ўдар. Не сакрэт, што без такога падсілкоўвання эканоміка Беларусі, і так не моцна эфектыўная, цалкам можа не вытрымаць і ў адзін цудоўны момант абрынуцца.

Аднак гэта агульныя словы. Але ёсць і канкрэтыка, прычым вельмі непрыемная менавіта для Расеі. Рэч у тым што ўсе гэтыя санкцыі ЕЗ б'юць наўпрост па галоўным беларускім хаўрусніку, хоць бы таму што многія менавіта расейскія кампаніі і прадпрымальнікі (у тым ліку вядомыя) наўпрост супрацоўнічаюць як з Беларуссю, так і з Лукашэнкам асабіста.

Сутыкацца з перспектывай блакавання сваіх еўрапейскіх рахункаў відавочна не ўваходзіць у іхнія планы. Прычым пакуль гаворка ідзе пра еўрапейскія санкцыі, але не за гарамі і амерыканскія – Кангрэс ухваліў адпаведны дакумент (Акт аб дэмакратыі ў Беларусі), так што, хутчэй за ўсё, Вашынгтон не адстане.

Ну, і зноў жа не сакрэт, што ў выпадку калапсу эканомікі хаўрусніка ратаваць яго давядзецца менавіта «старэйшаму брату» – Расеі. Іншага на сёння ў Лукашэнкі няма. Хоць грошай, як вядома, расейцам самім не хапае.

Але, мяркуючы з усяго, Лукашэнка не збіраецца спыняцца, а гэта значыць, што за трэцім санкцыйным пакетам з'явіцца і чацвёрты, і пяты.

Заходнія партнёры доўга запрагаюць, але калі ўжо бяруцца, то ад свайго не адступаюць. Зноў жа чыннік Байдэна і новая амерыканская палітыка на постсавецкай прасторы – справа таксама найбліжэйшай будучыні. Хочацца верыць, што ў Маскве гэта разумеюць.

Анансаваны візіт у Менск Сяргея Лаўрова. Папярэднія спробы неяк вярнуць да розуму Лукашэнку калі і рабіліся, то выніку не мелі, станавілася толькі горш.

Можа быць, гэтым разам у Сяргея Віктаравіча атрымаецца неяк паўплываць на партнёра. У адваротным выпадку ёсць пагроза, што беларускі калапс наўпрост адгукнецца Расеі. Прычым у самай непрыемнай эканамічнай частцы.