Як тысячы пенсіянераў прарваліся Маршам у заблакаваны цэнтр Менска
19- 23.11.2020, 17:10
- 67,284
Людзі сталага веку паказалі немалую адвагу.
Пусты праспект, заблакаваныя вуліцы, зачынены выхад з метро «Плошча Леніна», сотні амапаўцаў у чорным - так выглядаў цэнтр Менска ў панядзелак. Прычына - штотыднёвы Марш пенсіянераў, піша nashaniva.by.
Толькі паджылыя людзі цяпер могуць дазволіць сабе сабрацца на галоўным праспекце сталіцы Беларусі. Тых, хто маладзейшы, з плакатамі або сцягамі, карнікі тут хапаюць неміласэрна.
Аднак сёння лукашысты пайшлі далей, ужыўшы сілу і супраць пенсіянераў. Паджылыя людзі паказалі немалую адвагу, прайшоўшы маршам у такіх умовах.
Сілавікі атачылі калону. Вось як гэта было:
Пенсіянераў не пускалі, адштурхоўвалі. Людзі скандавалі на адрас Лукашэнкі «Пайшоў прэч, ты і твой АМАП!», а на адрас сілавікоў - «Фашысты!» і «Халуі!».
Журналісты апублікавалі аматарскія відэа, знятыя жыхарамі з вокнаў дамоў.
У выніку сілавікі рассеклі калону на дзве. Частка пенсіянераў прарвалася да плошчы Перамогі, дзе міліцыянты затрымалі чалавека са сцягам. Другая частка прасачылася вуліцай Янкі Купалы ў кірунку Опернага тэатра.
Ля Опернага тэатра амапаўцы зноў рассеклі калону пенсіянераў на яшчэ дзве. Адна накіравалася да праспекта Незалежнасці вуліцай Пашкевіч, другая - Камуністычнай. Пенсіянеры праяўляюць выключную вытрымку.
Ля Асмалоўкі АМАП яшчэ раз атакаваў пенсіянераў. Відавочцы паведамляюць пра затрыманні.
Толькі невялікай частцы ўдзельнікаў Марша ўдалося прарвацца да плошчы Якуба Коласа.
Вось яшчэ некалькі фота і відэа сённяшняга маршу:
***
Гэта ўжо восьмы Марш пенсіянераў. Першы адбыўся 5 кастрычніка. Ідэя маршаў у пенсіянераў паўстала пасля таго, як улады сталі масава затрымліваць і адлічваць пратэстуючых студэнтаў. Людзі сталага веку пастанавілі: калі маладым не даюць выказаць сваю грамадзянскую пазіцыю, то даносіць меркаванне грамадства павінны старыя. Некаторыя маршы адзначыліся драматычнымі сутыкненнямі з «праваахоўнікамі»: супраць пенсіянераў ужылі слезацечны газ пасля таго, як тыя адбілі затрыманых медыкаў насупраць 1-й клінічнай лякарні.