У Швайцарыі выявілі паўднёваафрыканскі варыянт каранавіруса

Паўднёваафрыканскі варыянт быў знойдзены ў двух узорах.

Першыя выпадкі заражэння паўднёваафрыканскім штамам каранавіруса выяўлены ў Швайцарыі, пры гэтым адзін з двух заражаных цяпер знаходзіцца ў Францыі, паведамляе ў нядзелю Федэральная сядзіба грамадскага здароўя.

"У рамках свайго даследавання Швайцарская найвышэйшая тэхнічная школа Цюрыха сэквэнавала блізу 500 узораў ад людзей з дадатнымі вынікамі (на каранавірус) ... Паўднёваафрыканскі варыянт быў знойдзены ў двух узорах, тады як брытанскі варыянт не знойдзены", - гаворыцца ў паведамленні.

Як адзначаецца, адзін з хворых знаходзіцца ў кантоне Швіцы, другі - у Францыі. Падкрэсліваецца, што швайцарская Федэральная сядзіба грамадскага здароўя падтрымлівае кантакты з уладамі Швіцу і Францыі.

Ва ўстанове нагадалі, што раней у кантонах Цюрыху і Граўбюндэне былі выяўленыя першыя выпадкі заражэння брытанскім штамам каранавіруса, дадатныя вынікі далі пробы двух жыхароў Вялікай Брытаніі. Паводле звестак уладаў, трэці выпадак заражэння такім штамам пазней быў выяўлены ў Ліхтэнштайне.

Раней стала вядома аб выяўленні ў Вялікай Брытаніі новай мутацыі каранавіруса SARS-CoV-2. У суботу кансультацыйная рада новых і ўзнікальных рэспіраторных вірусных пагрозах Брытаніі пацвердзіла, што варыянт каранавіруса, выяўлены ў краіне, распаўсюджваецца з большай хуткасцю і патрабуе ад насельніцтва яшчэ большай асцярожнасці. Хоць новы варыянт віруса, паводле папярэдніх ацэнак, можа быць на 70% заразнейшы за звычайны, нішто пакуль не кажа пра тое, што ён больш небяспечны з пункту гледжання смяротнасці або шпіталізацыі.

У Міністэрстве здароўя ПАР раней таксама паведамілі, што генетыкі выявілі новую для краіны мутацыю каранавіруса, названую 501.V2.