Юры Гараўскі раскрыў сваё месцазнаходжанне

Аўтар сенсацыйных прызнанняў пра забойствы апанентаў Лукашэнкі папрасіў палітычны прытулак.

Юры Гараўскі, былы баец спецыяльнага атрада хуткага рэагавання (САХР) унутраных войскаў МУС Беларусі, папрасіў палітычны прытулак у Швэйцарыі, паведамляе Deutsche Welle.

Гараўскі, які прызнаўся ў інтэрв'ю Deutsche Welle ва ўдзеле ў выкраданнях і забойствах у 1999 годзе крытыкаў Лукашэнкі, апавёў, што не бачыць сэнсу далей хаваць сваё месцазнаходжанне. Першапачаткова ён казаў, што знаходзіцца ў адной з еўрапейскіх краінаў.

"Адсочваючы маіх блізкіх, вылічыць мой нумар тэлефона нескладана. А праз код можна даведацца, якая гэта краіна. Хутчэй за ўсё, гэта ўжо зрабілі", – упэўнены Гараўскі.

Экс-сахравец сцвярджае, што гатовы панесці пакаранне за ўдзел у забойствах экс-міністра ўнутраных справаў Беларусі Юрыя Захаранкі, экс-кіраўніка Цэнтрвыбаркама Віктара Ганчара і бізнэсмэна Анатоля Красоўскага, які падтрымліваў беларускую апазіцыю. Аднак Гараўскі хоча, каб яго судзілі ў Еўропе, а не ў Беларусі.

Пры гэтым ён не хавае, што, нават знаходзячыся ў Швэйцарыі, баіцца за сваё жыццё.

"Пасля таго як мы забілі гэтых людзей, я ўсе гэтыя гады баяўся, што нас пачнуць аднаго за адным альбо ліквідаваць, альбо саджаць. Я і цяпер не выключаю, што (з Беларусі. – Рэд.) прыедуць мяне забіваць. Але ўсё ж тут ёсць шанцы выжыць", – мяркуе ён.

Былы баец САХРу апынуўся ў Швэйцарыі ў кастрычніку 2018 года. Падрабязнасці таго, як ён туды трапіў і чаму ўцёк з Беларусі, 41-гадовы Гараўскі не паведамляе. Пастанова датычна ягонага хадайніцтва пра наданне прытулку ў Швэйцарыі пакуль не прынятая.

Забойства Захаранкі, Ганчара і Красоўскага

У інтэрв'ю Deutsche Welle, апублікаваным у снежні 2019 года, Юры Гараўскі заявіў, што ўдзельнічаў у выкраданнях і забойствах палітыкаў, якія дамагаліся адстаўкі прэзідэнта Аляксандра Лукашэнкі. Паводле словаў Гараўскага, апазіцыянераў выкралі байцы САХРу, у ліку якіх быў і ён сам, пад кіраўніцтвам стваральніка атрада падпалкоўніка Дзмітрыя Паўлічэнкі. Гараўскі сцвярджае, што Паўлічэнка і застрэліў апазіцыянераў.

Паводле ягоных словаў, цела экс-кіраўніка МУС Захаранкі, які знік 7 траўня 1999 года, было спаленае ў крэматорыі на Паўночных могілках у Менску. Целы экс-кіраўніка Цэнтрвыбаркама Ганчара і бізнэсоўца Красоўскага, выкрадзенага 16 верасня 1999-га, былі, паводле сцвярджэнні Гараўскага, закапаныя ля базы САХРу пад Бягомлем за 100 км ад Менска. Экс-сахравец перакананы, што выкраданні і забойствы здзяйсняліся з ведання найвышэйшых службовых асобаў Беларусі.

Расследаванне знікненняў апазіцыянераў у Беларусі адноўленае

Прызнанні Юрыя Гараўскага супадаюць з высновамі спецдакладніка Парламенцкай асамблеі Рады Еўропы (ПАРЕ) Хрыстаса Пургурыдэса, які ў 2004 годзе расследаваў знікненні беларускіх апазіцыянераў. Пасля выхаду інтэрв'ю Гараўскага Следчы камітэт Беларусі падоўжыў папярэдняе расследаванне справаў аб знікненні Захаранкі, Ганчара і Красоўскага да 18 лютага 2020 года.