Абас назваў умовы перамоваў з Ізраілем

Пра гэта кіраўнік Палестыны заявіў на пасяджэнні Рады бяспекі ААН, прысвечаным «угодзе стагоддзя».

Кіраўнік Палестыны Махмуд Абас заявіў, што гатовы застацца ў штаб-кватэры ААН у Нью-Ёрку, каб працягнуць перамовы з Ізраілем. Пра гэта ён заявіў на пасяджэнні Рады Бяспекі ААН, прысвечаным «угодзе стагоддзя» ЗША, паведамляе РБК.

Раней у сваёй прамове ён адхіліў прапанаваны Злучанымі Штатамі дакумент па ўрэгуляванні палестына-ізраільскага канфлікту. Пасля гэтага Абас заявіў, што калі ізраільскі бок гатовы да перамоў, а ААН, ЕЗ, ЗША і Расея гатовыя іх падтрымаць, то ён можа застацца.

«Я кажу сур'ёзна. Проста цяпер я гатовы застацца тут, у ААН, для пачатку перамоў», - сказаў палестынскі лідар.

У канцы студзеня прэзідэнт ЗША Дональд Трамп прапанаваў план урэгулявання канфлікту паміж Ізраілем і Палестынай, які атрымаў назву «ўгодай стагоддзя».

Дакумент прадугледжвае стварэнне дзвюх дзяржаў. Сталіцай Ізраіля застаецца Ерусалім, а палестынскай сталіцай - Усходні Ерусалім.

Згодна з «угодай стагоддзя» Храмавая гара ў Ерусаліме захоўвае статус кво, Ізраіль распаўсюджвае суверэнітэт на Іарданскую даліну, Самарыю, Іўдзею. Палестына ўдвая павялічвае сваю тэрыторыю. Пры гэтым палестынскі радыкальны рух ХАМАС павінны быць раззброены, а Сектар Газа дэмілітарызаваны.