Лукашэнка: Затрыманыя дырэктары цукровых заводаў ужо просяцца ў калгас гной грузіць
72- 14.02.2020, 19:32
- 60,041
Дыктатар заявіў, што яны прызналі віну.
Лукашэнка ў час «працоўнай паездкі» ў Гомельскую вобласць заявіў, што затрыманыя кіраўнікі цукровых заводаў краіны прызналі віну і просяць не пазбаўляць іх свабоды. Сюжэт паказалі на тэлеканале СТВ, піша tut.by.
Дыктатар адзначыў, што заўсёды «строга» пытаецца з кіраўнікоў прадпрыемстваў і ўспомніў «цукровую справу».
- Нядаўна адразу ўсіх чацвярых з цукровых заводаў... Вось сядзяць цяпер і просяцца «адпусціце, пойдзем у калгас гной грузіць». А я кажу: «Мы віламі ўжо гной не грузім, таму сядзіце». Прызналіся, дзе кралі, усё пааддавалі, усё, кажуць, забірайце, толькі ў турму не саджайце. А хто цябе пасадзіў у турму? Ты сам сябе пасадзіў. Я ўвесь час кажу: не чапай чужое. Не чапай. Асабліва кіраўнік. Калі ты крадзеш, якім тут можа быць прадпрыемства? - сказаў ён.
Нагадаем, кіраўнікі ўсіх цукровых заводаў краіны былі затрыманыя яшчэ ў канцы студзеня і цяпер знаходзяцца ў СІЗА. Пад вартай апынуліся Міхаіл Крыштаповіч (Гарадзейскі камбінат), Віктар Міронаў (Жабінкаўскі цукровы завод), Мікалай Пруднік (Слуцкі камбінат), Дзмітрый Ягораў (Скідзельскі завод). Распачатыя крымінальныя справы паводле ч. 3 арт. 430 КК (Атрыманне хабару ў асабліва значных сумах) і паводле ч. 2 арт. 431 (Дача хабару ў буйнай суме).
«Правялі ператрусы - уласнасці нямерана: там дзясяткі самых сучасных аўтамабіляў, кватэры дзясяткамі, асабнякі і велізарная колькасць грошай», - распавёў Лукашэнка, каментуючы «цукровую справу».
Паводле інфармацыі КДБ, якая была агучана ў эфіры тэлеканалу «Беларусь 1», прадпрыемствы адгружалі прадукцыю на экспарт Беларускай цукровай кампаніі, значная яе частка сыходзіла «падкантрольным пасярэднікам». Затым гэты ж цукар перапрадавалі даражэй на сваім жа рынку. Акрамя таго, выдаткі на вытворчасць павялічваліся за кошт продажу расейскім пасярэднікам упакоўкі па завышаным кошце. «Штогод сумы хабараў вылічаліся сотнямі тысяч даляраў», - заявілі ў КДБ.
6 лютага стала вядома, што фігурантам «цукровай справы» ўжо выстаўленае абвінавачванне.