Лукашэнка прадаўжае гуляць у расейскую рулетку

Крэмль як піць даць можа стварыць новыя цяжкасці.

Палітычны аглядальнік Аляксандр Класкоўскі пракаментаваў на naviny.by свежыя рэзкія выказванні Лукашэнкі ў дачыненні да Расеі.

- Прычыну рэзкіх заяваў Лукашэнкі на адрас Масквы доўга шукаць не трэба. Бо трэба растлумачыць, чаму беларусам будзе горш. Ці, прынамсі, чаму ім не бачыць хоць бы польскіх заробкаў...

Тлумачэнне такое: у абмен на танныя нафту і газ Крэмль навязвае інкарпарацыю, на што ён пайсці не можа.

Зрэшты, надзеі, што формула «братэрскай інтэграцыі» яшчэ прынясе нейкую аддачу, мабыць, цепляцца ў Лукашэнкі і дагэтуль. Як вынікае з ягоных сённяшніх адкрыццяў, на перамовах у Сочы ён апеляваў да супольнай савецкай гісторыі. Напрыклад, падкрэсліў, што беларусы працавалі на распрацоўцы нафтавых і газавых радовішчаў у Сібіры. З празрыстым намёкам, што за гэта не грэх бы даць зніжку.

Але мяркуючы з вынікаў Сочы, гэтыя эмацыйныя довады не паўплывалі на пазіцыю расейскага боку. І наўрад ці паўплываюць. Так што сённяшнія тлумачэнні - размовы на карысць бедных. Лукашэнка хутчэй спрабуе апраўдацца перад электаратам за паразы на ўсходнім фронце, чым разжаліць маскоўскіх «бухгалтараў», гэтых чортавых рыначнікаў, засеўшых дзесьці ў асяроддзі Пуціна.

Самога Пуціна Лукашэнка з дыпламатычных меркаванняў спрабуе вывесці за дужкі, але неяк непераканаўча...

Небяспека (прадаўжэнне перамоваў аб дарожных картах) у наяўнасці, і Лукашэнка яе напэўна ўсведамляе. Але, як бачым, мае намер прадаўжаць гульню ў расейскую рулетку - відавочна, у надзеі адхапіць хоць поўсці клок. І ў энэргарэсурсах, і ў іншых пытаннях.

Калі ж дэманстратыўна адмовіцца ад дарожных карт, пачаць біць увесь інтэграцыйны посуд, то Крэмль як піць даць можа стварыць новыя цяжкасці. Напрыклад, у пытанні крэдыту на Астравецкую АЭС.