Зяленскі прапанаваў патруляваць АРДЛА разам з іх прадстаўнікамі
11- 16.02.2020, 11:46
- 10,295
Ініцыятыва была агучаная на канферэнцыі ў Мюнхене.
Украіна прапанавала патруляваць часова акупаваныя тэрыторыі Данецкай і Луганскай абласцей супольна з прадстаўнікамі гэтых тэрыторый і чальцамі місіі АБСЕ ў якасці ўмовы для правядзення мясцовых выбараў на Данбасе. Пра гэта заявіў прэзідэнт Уладзімір Зяленскі падчас Украінскага ланчу ў Мюнхене, паведамляе liga.net.
Прэзідэнт адзначыў, што для правядзення выбараў важна мець кантроль над мяжой і механізмы кантролю акупаванай тэрыторыі.
З ягоных слоў, разглядаецца магчымасць супольнага кантролю. «Там будуць украінцы, прадстаўнікі акупаваных тэрыторый і АБСЕ», - растлумачыў ён. Зяленскі не ўдакладніў, пра якіх менавіта прадстаўнікоў ідзе гаворка, але падкрэсліў, што Украіна пераконвае партнёраў у менскіх перамовах узгадніць такі варыянт. Ён таксама сказаў, што гэта пытанне абмяркоўвалася ў нармандскім фармаце.
Першапачаткова шэраг СМІ паведамілі, што Зяленскі пагадзіўся на супольнае з прадстаўнікамі АРДЛА патруляванне дзяржмяжы.
Пазней крыніца УП ва ўкраінскай дэлегацыі ў Мюнхене удакладніла, што «гаворка ідзе аб супольным патруляванні на акупаваных тэрыторыях украінскай паліцыі, АБСЕ і тэрытарыяльнай паліцыі». Што тычыцца мяжы, то Украіна разлічвае мець над ёй непасрэдны кантроль, сказаў суразмоўца выдання.
4 лютага назіральнікі спецыяльнай маніторынгавай місіі АБСЕ зафіксавалі 14 тэнтаваных грузавікоў на трох непадкантрольных адцінках украінска-расейскай мяжы.
11 лютага Зяленскі заявіў, што адчувае, што Расея гатовая думаць над змяненнем менскіх пагадненняў, і спадзяецца на правядзенне выбараў ва ўсёй Украіне ўвосень гэтага года.