У Брытаніі шалее магутны шторм «Дэніс»

У краіне чакаюцца паводкі.

Два чалавекі патанулі ў Паўночным моры і хаос узнік па ўсёй Вялікай Брытаніі ў выніку шторму "Дэніс", які другі дзень шалее ў краіне.

Пра гэта паведамляе "Еўрапейская праўда" са спасылкай на Sky News.

Моцныя дажджы і вецер прайшлі ў суботу значнымі часткамі Вялікай Брытаніі. СМІ публікуюць фота з падтопленымі дарогамі і чыгуначнымі шляхамі, некаторыя будынкі таксама апынуліся пад вадой.

На ўсходнім узбярэжжы ў Паўночным моры знайшлі целы двух мужчынаў, якія патанулі падчас урагану.

У Паўднёвым Уэльсе абвешчанае чырвонае папярэджанне, якое азначае, што паводкі і ападкі могуць мець небяспеку для жыцця. Напрыклад, у горадзе Понціпул з берагоў выйшла рака Таф.

Цягам 24 гадзінаў у Паўднёвым Уэльсе выпала 105 мм дажджу, у той час як у рэгіёне зафіксаваныя штармавыя парывы ветру да 91 мілі за гадзіну.

У Англіі сур'ёзныя папярэджанні пра паводкі абвешчаныя ў горадзе Вустэр, дзе вада ў рацэ Тэмзе прадаўжае падымацца. Сотня іншых папярэджанняў у сувязі з непагаддзю распаўсюджаная па ўсёй краіне.

У суботу армію накіравалі ў Заходні Ёркшыр, каб дапамагчы людзям падрыхтавацца да шторму.

Чыгуначнае злучэнне ў Паўднёвым Уэльсе прыпыненае, лініі ў Нотынгемшыры і Дэрбішыры таксама былі зачыненыя праз затапленне. Некаторыя рэйсы EasyJet скасаваныя праз непагадзь.

Сіноптыкі папярэдзілі, што шторм "Дэніс" будзе шалець у частках краіны ў нядзелю.