«Тэмпературу правяралі нават у кавярні, дзе заказваў піцу»

Жыхар кітайскага Сучжоу – пра тое, як жыве горад.

Украінскі музыка Васіль Фядчук жыве ў горадзе Сучжоу, недалёка ад Шанхая. Ён апавёў «Сапраўднаму часу» пра тое, як там складваецца сітуацыя з прафілактыкай каронавірусу, як гэта ўплывае на жыццё гараджанаў і з якімі абмежаваннямі ім даводзіцца сутыкацца.

– У першую чаргу гэта захады, звязаныя з перамяшчэннем. Напрыклад, мне цяжка наведваць сваіх сяброў, якія жывуць у іншых комплексах, – яны ўсе зачыненыя, ёсць КПП. Усюды адкрытыя толькі паўднёвыя брамы, чамусьці так пастанавілі, і ўсе праходзяць толькі праз іх, і толькі тыя, хто там жыве. Калі я прыходжу да сваіх сяброў, я павінен нейкія байкі прыдумляць пра тое, што я там насамрэч жыву.

Кажуць, што міжгароднія пераезды таксама пад строгім кантролем. Напрыклад, мая сяброўка прыехала з Сінчжана ў Шанхай, назад на працу, і ўлады Шанхая абавязалі яе два тыдні сядзець дома і ўвогуле не выходзіць, тыпу на карантыне.

Я магу выходзіць з свайго жылога комплексу і заходзіць калі захачу. Пры выхадзе мне даюць квіток, і калі я вяртаюся, вяртаю гэты квіток. Яны правяраюць у мяне тэмпературу – і ўсё, праблемаў няма. Сёння я хадзіў у адзін рэстаран недалёка ад майго дома, нават нейкія хлопцы ў більярд гулялі. Да мяне падышоў супрацоўнік рэстарана, замераў тэмпературу градуснікам лазерным і папырскаў мяне нейкім спіртам.

Зразумела, што ніякія рэстараны, кавярні, ні кавы папіць, нікуды, ніякія свецкія раўты цяпер не даступныя, усе кінатэатры, тэатры зачыненыя, усе публічныя мерапрыемствы забароненыя.

Аўтобусаў ездзіць нашмат менш. Гэта таксама, дарэчы, я сам заўважыў: прастаяў на прыпынку гадзіну і ўзяў таксі, мясцовы "убер" – DiDi. І калі ехаў, у дадатку ў мяне выскачыла: "Пераканайцеся, што кіроўца носіць маску". Я націснуў, што кіроўца ў масцы, усё добра. Гэта значыць, за гэтым сочаць на ўсіх узроўнях.