У Менску адчынілася выстава мастака Алеся Марачкіна

Выстава прымеркаваная да 80-годдзя вядомага беларускага мастака.

Новыя працы мастака Алеся Марачкіна прысвечаныя значным падзеям апошніх гадоў, якія адбываліся падчас кіравання краінай Аляксандра Лукашэнкі, і адлюстроўваюць сацыяльна-палітычную сітуацыю ў Беларусі праз уласны крытычны погляд творцы, піша сайт тэлеканала «Белсат».

У Менску на асветніцкай пляцоўцы «Тэрыторыя правоў» адчынілі выставу «Зацьменне» беларускага мастака Алеся Марачкіна. Назва выставы асацыюецца з апошнімі 25 гадамі існавання Беларусі ва ўмовах аўтарытарызму, а сама падзея прымеркаваная да 80-годдзя вядомага беларускага мастака, якое ён будзе адзначаць неўзабаве.

На адкрыццё выставы Алеся Мары (творчы псеўданім Марачкіна) прыйшлі сябры і калегі, праваабаронцы, грамадскія актывісты і проста прыхільнікі ягонай творчасці. Мерапрыемства адкрыў старшыня ПЦ «Вясна» Алесь Бяляцкі.

Выстава арганізаваная пры дапамозе Праваабарончага цэнтра «Вясна» і экспануецца ўпершыню на асветніцкай пляцоўцы «Тэрыторыя правоў». Паглядзець творы Алеся Марачкіна можна па адрасе вуліца Ложынская, 16 цягам месяца.