Міністэрства аховы здароўя: Студэнт з Ірана - альбо носьбіт каранавірусу, альбо ўжо лёгка перахварэў

З ім усё добра.

27 лютага ў Беларусі выявілі першы выпадак захворвання на каранавірусную інфекцыю. Яе носьбіт студэнт БНТУ, які нядаўна вярнуўся з Ірана. На брыфінгу для журналістаў у другой палове пятніцы міністр аховы здароўя Уладзімір Каранік распавёў, што пацыент адчувае сябе здавальняюча, сімптомаў каранавірусу ў яго няма. Наяўнасць віруса 2019-nCoV паказалі лабараторныя даследаванні, паведамляе tut.by.

Уладзімір Каранік распавёў, што ў пацыента няма клінічных сімптомаў каранавірусу. Але звесткі лабараторных даследаванняў паказалі фрагменты РНК каранавірусу. Гэта, са слоў міністра, можа сведчыць аб носьбіце віруса або аб лёгкай форме перанесенага захворвання.

- У кожным выпадку чалавек знаходзіцца пад наглядам і не патрабуе лячэння.

Уладзімір Каранік таксама ўдакладніў, што ўсе студэнты, якія блізка з ім кантактавалі, цяпер знаходзяцца пад наглядам.

Таксама Міністэрства аховы здароўя мае звесткі, колькі пасажыраў ляцела са студэнтам з Баку.

- З іх было 19 транзітных пасажыраў, якія паляцелі далей. Чатыры чалавекі знаходзіліся бліжэй за ўсё да студэнта. Адзін з іх паляцеў далей. Службы іншых краін праінфармаваныя пра гэты выпадак, - адзначыў міністр. - Гэтыя людзі павінны быць і будуць абследаваныя.

Галоўны інфекцыяніст краіны Ігар Карпаў абследаваў пацыента з выяўленым каранавірусам і сёння раніцай, і ўдзень перад ад'ездам на брыфінг. Са слоў прафесара, студэнт знаходзіцца ў здавальняючым стане. У яго няма тэмпературы і прыкмет інтаксікацыі.

- Цяпер клінічных прыкмет захворвання няма, - рэзюмаваў лекар.

У студэнтаў, якія знаходзяцца ў шпіталі ў Бараўлянах пад медыцынскім наглядам, цяпер бяруць аналізы. У тых, што ўжо гатовыя, наяўнасць РНК каранавіруса не выяўленая.

- Гэтыя студэнты ўважаюцца за кантакты першага ўзроўню, - патлумачыў міністр Уладзімір Каранік. - носьбітамі віруса яны не з’яўляюцца.

Нагадаем, што 27 лютага тэсты, праведзеныя ў Рэспубліканскім навукова-практычным цэнтры эпідэміялогіі і мікрабіялогіі, паказалі наяўнасць каранавіруса 2019-nCoV у аднаго са студэнтаў з Ірана. Ён вучыцца на механіка-тэхналагічным факультэце БНТУ.

Маладзён прыляцеў у Менск 22 лютага, а 7.10 раніцы рэйсам з Баку. Увечары 27 лютага яго шпіталізавалі ў Менскую гарадскую інфекцыйную лякарню. Там жа знаходзяцца ягоная дзяўчына і яе сваякі, якія апошнія кантактавалі з хворым.