«Еўра амаль па тры рублі, банкаматы без даляраў»
18- 21.03.2020, 14:11
- 22,998
![«Еўра амаль па тры рублі, банкаматы без даляраў»](https://i.c97.org/p/articles/ai-181183-aux-head-20151203_money_dollar_euro_360.jpg)
Што адбываецца з валютай у Беларусі?
Беларускі рубель прадаўжае зніжацца да даляра на таргах на валютна-фондавай біржы, так і ў абменніках. Максімальны курс еўра па-ранейшаму трымаецца блізу 3 рублёў, а даляра - 2,8 рубля. Але, нягледзячы на падаражанне валюты, попыт на яе не спадае. У гэтай сітуацыі адзін з банкаў, да прыкладу, прыкметна павялічыў колькасць дзён, за якія кліент павінен паведаміць аб жаданні зняць грошы з рахунку. Многія банкі па-ранейшаму не загружаюць валюту ў банкаматы. Тым часам Нацбанк даў рэкамендацыі, як забяспечыць бесперабойнае абслугоўванне фізічных асоб, піша
Як змяняўся курс валют на гэтым тыдні і колькі цяпер каштуюць даляр і еўра ў абменніках
На гэтым тыдні курсы валют прыкметна выраслі ў абменніках яшчэ ў сераду, 18 сакавіка. Самы «дарагі» даляр дасягаў 2,5 рубля, а еўра — 2,79 рубля. Пасля таргоў на Беларускай валютна-фондавай біржы 19 сакавіка нацвалюта аслабла да асноўных валют. Яшчэ падчас таргоў у абменніках даляр падаражэў да 2,7 рубля, а еўра — да 2,9. Але, нягледзячы на рост, паўстаў прыкметны попыт на валюту, якая знікла з многіх банкаматаў і абменнікаў. Экспэрты і ўлады растлумачылі, што недахоп амерыканскай валюты выкліканы ў тым ліку цяжкасцямі з дастаўкай валюты з ЗША. У гэтай сітуацыі Нацбанк не прадаваў банкам валюту, а яны, у сваю чаргу, прапаноўвалі для продажу толькі тую, якую здавалі кліенты. У выніку ў многіх банкаматах у чацвер скончылася валюта, складанасці з купляй даляраў і еўра былі таксама ў многіх абменніках. У крамах вырас попыт на тэхніку.
На апошніх таргах на Беларускай валютна-фондавай біржы на гэтым тыдні, 20 сакавіка, беларускі рубель знізіўся да даляра і расейскага рубля, але крыху ўмацаваўся да еўра. У першай палове дня 20 сакавіка курс еўра ў некаторых банках перавысіў 3 рублі, а даляра - 2,8 рубля. Пасля абеду курс еўра ў абменніках крыху знізіўся. Даражэй за ўсё прадаваў гэтую валюту БСБ Банк - па 2,992 рубля. Самы высокі курс продажу даляра ў другой палове дня назіраўся на ўзроўні 2,8 рубля (Франсабанк).
Сёння, 21 сакавіка, максімальны курс продажу банкам еўраў - 2,99 рубля (БПС-Ашчадбанк і Беларускі народны банк), а даляра - 2,8 рубля (у гэтых жа банках).
Ці загружаюць у банкаматы валюту і як хутка можна зняць грошы з рахунку
У некаторых банкаматах банкаў па-ранейшаму адсутнічае валюта. У адных выпадках яе не загружаюць у апошнія дні, у іншых - неўзабаве здымаюць. Да прыкладу, банкаматы Беларускага народнага банка цяпер не загружаюцца валютай. Няма даляраў і еўраў таксама ў банкаматах «Альфа-Банка». У РРБ-Банку паведамілі, што 20 сакавіка банкамат у Менску на Чырвоназорнай, 18 быў загружаны далярамі. «Пры іх наяўнасці вы можаце іх набыць таксама ў касах на гэты адрас да 15.00», - паведамілі ў кантакт-цэнтры банка.
«Абмежаванняў мы не ўводзілі на інкасацыю, аднак у сувязі з падвышаным попытам гарантаваць наяўнасць валюты ў банкаматах мы не можам», - распавялі ў банку «Дабрабыт».
Мы таксама пацікавіліся ў банкаў, на якіх умовах цяпер можна зняць грошы са свайго рахунку. Да прыкладу, у «Альфа-Банку» сёння можна замовіць грошы на 27 сакавіка. Для зняцця суму трэба заказваць. Для гэтага трэба напісаць заяву з провішчам, нумарам мабільнага тэлефона, сумай, валютай і нумарам аддзялення, у якім хочаце забраць грошы.
У «Белгазпрамбанку» сёння можна пакінуць заяўку на зняцце грошай з адзыўнога ўкладу на 27 сакавіка. «Безадзыўны ўклад толькі (вяртаецца. — Заўвага. рэд. ) па заканчэнні тэрміну дзеяння ўкладу» — удакладнілі ў банку.
Банк «Дабрабыт» увёў змены для зняцця грошай з рахункаў. З 20 сакавіка пры зняцці сумы, большай за 1000 даляраў у эквіваленце, трэба пісаць заяву за 10 рабочых дзён (раней - за 3 дні). Для замовы грошай можна патэлефанаваць у кантакт-цэнтр банка.
«Вы можаце здымаць да 10 000 рублёў у эквіваленце за дзень у банкаматах. Да 5000 рублёў з рахунку ў аддзяленні, калі сума большая, то неабходна папярэдне замовіць сродкі. Пры звароце да 11.00 сума будзе выдадзеная на трэці працоўны дзень, пасля 11.00 - на пяты» — распавялі ў «Ідэя Банку».
У «Тэхнабанку» паведамілі, што безадзыўныя ўклады не скасоўваюць у найбліжэйшы тыдзень, і рэкамендавалі для ўдакладнення звярнуцца пазней. Пры зняцці грошай з адзыўнога ўкладу па дамове трэба паведаміць банк за 5 дзён да звароту, каб суму падрыхтавалі.
Якія рэкамендацыі атрымалі банкі праз недахоп даляраў
Нацбанк разаслаў банкам рэкамендацыі, як забяспечыць бесперабойнае абслугоўванне фізічных асоб пры падвышаным попыце на асобныя аперацыі. Рэгулятар раіць, да прыкладу, не завышаць курс канверсіі пры зняцці гатоўкі, якая адрозніваецца ад той, у якой адкрыты рахунак. Банкі таксама просяць «у існых умовах, якія характарызуюцца адсутнасцю паводле аб'ектыўных прычын дастатковага аб'ёму наяўных даляраў» падмацоўваць абменнікі іншай наяўнай замежнай валютай.
Рэгулятар таксама звярнуў увагу на недапушчальнасць уводу неабгрунтаваных абмежаванняў або ўзнагароджанняў за банкаўскія аперацыі, у тым ліку пры зняцці гатоўкі з рахункаў і пры безнаяўных разліках.
Раней, 19 сакавіка, «Банк ВТБ Беларусь» абмяжоўваў валютна-абменныя аперацыі па картках. Ліміт на дзень быў эквівалентны 100 еўрам. Аднак у гэты ж дзень абмежаванні былі скасаваныя.
Што будзе з курсам валют найбліжэйшым часам?
На гэтае пытанне, мабыць, цяпер наўрад ці хтосьці адкажа з вялікай доляй імавернасці. Справа ў тым, што пакуль не вядома, калі ўдасца развязаць пытанне з бесперабойнай дастаўкай даляраў з ЗША. Не дадае пэўнасці на валютным рынку сітуацыя з пандэміяй каранавірусу і з коштамі нафты. Да ўсяго гэтага трэба дадаць эканамічную сітуацыю ў нашай краіне. Як заявіў напярэдадні Аляксандр Лукашэнка, на ягоную думку, мы ўжо ступілі адной нагой у фінансава-эканамічны крызіс.
У гэтай сітуацыі адны экспэрты прагназуюць далейшае ўмацаванне даляра і еўра, а іншыя — што курсы гэтых валют як мінімум застануцца на цяперашнім узроўні і, можа, нават трохі знізяцца. Але многія сыходзяцца ў меркаванні, што найбліжэйшым часам няма падстаў для прыкметнага зніжэння амерыканскай валюты і еўра.
У цяперашняй сітуацыі для пачатку трэба развязаць пытанне з недахопам валюты ў абменніках і банкаматах.
Што адбываецца ў гандлі?
Калі ў «чорны» панядзелак, 9 сакавіка, калі прыкметна ўпалі кошты нафты, а беларускі рубель пачаў губляць пазіцыі да валюты, беларусы не рэагавалі на гэта скупкай валюты і тавараў, то 19 сакавіка, калі курсы валют устанавілі чарговыя максімумы ў абменніках, сітуацыя змянілася. Беларусы сталі скупляць тэхніку.
За некалькі дзён да гэтага ў Беларусі вырас пакупніцкі попыт на тавары працяглага захоўвання, у тым ліку на сацыяльна значныя, бакалею і імпарт. Але ўжо, хутчэй, праз сітуацыю з каранавірусам.
Тым часам гандлёвыя сеткі прагназуюць падаражанне некаторых тавараў (у першую чаргу — імпартных) — як нехарчовых, так і харчовых.
- Мы чакаем падвышэння коштаў імпартных тавараў. Хутчэй за ўсё, гэта адбудзецца з 1 красавіка. Пакуль большасць рытэйлераў прадаўжаюць перамовы з пастаўшчыкамі і пратаколаў узгаднення кошту яшчэ няма. Наша пазіцыя - максімальнае стрымліванне коштаў, на што мы арыентуем і пастаўшчыкоў. Што тэарэтычна можа падаражэць? Некаторая садавіна, еўрапейская кава, італійская паста і т.д. Тавараў павышанага попыту сярод іх няма, — распавялі на ўмовах ананімнасці прадстаўнікі рытэйла.
Пры гэтым некаторыя тавары ўжо падаражэлі, у тым ліку імпартная садавіна і гародніна.
Чэргі цяпер ёсць не толькі ў гіпермаркетах, але і ў крамах бытавой тэхнікі. Онлайн-крамы таксама адзначаюць наплыў пакупнікоў.
- Вырас попыт на тэлевізары, халадзільнікі і іншую буйную бытавую тэхніку, як гэта звычайна і адбываецца падчас усіх нашых дэвальвацый — распавялі нам у онлайн-гіпермаркеце 21vek.by. - набываюць тыя, каму ў кожным выпадку гэта трэба было, але яны адкладалі куплю. Пакупнікі выдатна разумеюць, што потым будзе даражэй. Таму што ў нас большасць тэхнікі ў краіне не вырабляецца, а набываецца за мяжой.
У онлайн-гіпермаркеце кажуць, што кошты некаторых тавараў ужо пачалі расці. Некаторых яшчэ не. Таму людзі імкнуцца знайсці тое, што яшчэ не падаражэла, і набыць.
- Складана сказаць, як моцна падаражэюць тавары. Калі курсы валют застануцца на такім узроўні, як цяпер, то кошты паднімуцца прапарцыйна ім. Гэта калі тавар быў набыты за даляры. А калі ён набыты за расейскія рублі, то кошты не абавязкова вырастуць, бо расейскі рубель адносна беларускага часта падае.