У Грузіі ўвялі рэжым надзвычайнага становішча праз распаўсюд каранавірусу
3- 21.03.2020, 14:55
- 9,065
![У Грузіі ўвялі рэжым надзвычайнага становішча праз распаўсюд каранавірусу](https://i.c97.org/ai/369454/aux-head-1584268960-20200315_gruzija_360.jpg)
НС уводзіцца да 21 красавіка.
Прэзідэнтка Грузіі Саламэ Зурабішвілі ўвяла надзвычайнае становішча ў краіне да 21 красавіка для стрымлівання распаўсюду каранавірусу, паведамляе «Новая газета».
З такой просьбай да яе раней звярнуўся прэм'ер-міністр Георгій Гахарыя. Ён удакладняў, што гаворкі пра каменданцкую гадзіну і строгія каранцінныя захады на гэтым этапе не ідзе. У рамках рэжыму надзвычайнага здарэння ў Грузіі будуць забароненыя сходы больш чым з дзясяці чалавек, у тым ліку і ў крамах.
Таксама ўводзяцца абмежаванні на ўсе перавозкі, акрамя грузавых. У выпадку неабходнасці ўрад зможа арганізаваць «паўсюдную мабілізацыю» работнікаў сферы медыцыны і адукацыі. Парушэнне рэжыму надзвычайнага здарэння пагражае пакараннем у выглядзе штрафу, а за паўторнае парушэнне прадугледжаная крымінальная адказнасць тэрмінам да трох гадоў.
У Грузіі зарэгістраваныя 47 выпадкаў захворвання на каранавірус, адзін з пацыентаў ужо вылечыўся. Праз распаўсюд COVID-19 у краіне закрытыя ўсе адукацыйныя ўстановы, дзяржаўныя структуры і некаторыя прыватныя арганізацыі пераведзеныя на дыстанцыйны рэжым працы.
Раней грузінскія ўлады закрылі мяжу з Расеяй для турыстаў. З 18 сакавіка на два тыдні мяжу закрылі ўжо для ўсіх замежнікаў. Улады таксама скасавалі авіязлучэнні на ўсіх кірунках.