AFP: Амаль мільярд людзей у свеце застаецца дома праз каранавірус
5- 21.03.2020, 20:36
- 11,995
![AFP: Амаль мільярд людзей у свеце застаецца дома праз каранавірус](https://i.c97.org/ai/370291/aux-head-1584812162-20200321_ulica_360.jpg)
Гэта неабходна, каб прадухіліць распаўсюд.
На стан суботы амаль мільярд людзей ва ўсім свеце змушаны не пакідаць уласныя дамы, каб прадухіліць распаўсюд каранавірусу. Такія падлікі зрабіла AFP, паведамляе "Еўрапейская праўда".
Колькасць загінулых ад вірусу вырасла да 11 000 чалавек па ўсім свеце, прычым толькі ў самой Італіі, дзе за апошні тыдзень колькасць смяротных выпадкаў няўхільна расла, налічваецца 4000 смерцяў.
Паводле падлікаў AFP, у цяперашні час блізу 900 мільёнаў людзей знаходзяцца пад "хатнім арыштам" у 35 краінах свету, у тым ліку 600 мільёнаў тых, якія вымушаны не пакідаць свае дамы праз абавязковыя ўрадавыя забароны. Тут гаворка ідзе пра 22 краіны, чые ўрады афіцыйна ўвялі абмежаванні на рух.
Астатнія людзі жывуць у краінах, дзе дзейнічаюць каменданцкія гадзіны (як у Балівіі), карантын (як у галоўных гарадах Азербайджана і Казахстана) або проста прытрымліваюцца настойлівых заклікаў не пакідаць свае дамы (як у Іране).
У Еўропе найбольш жорсткія абмежаванні цяпер дзейнічаюць у Італіі, Францыі, Бельгіі, Гішпаніі, Аўстрыі.
У той час як прэзідэнт Амерыкі Дональд Трамп настойвае на тым, што Злучаныя Штаты перамогуць вайну супраць вірусу, асобныя штаты рэзка зрабілі больш жорсткімі абмежаванні, а Нью-Ёрк і Ілінойс далучыліся да Каліфорніі, загадаўшы жыхарам заставацца дома.
Больш за ўсё пакутуюць ад вірусу пажылыя людзі і людзі з ужо існымі захворваннямі, але Сусветная арганізацыя здароўя папярэдзіла, што маладыя людзі таксама ўразлівыя.
"Сёння ў мяне ёсць пасланне для моладзі: вы не непераможныя. Гэты вірус можа пакласці вас у лякарню на некалькі тыдняў – ці нават забіць", – сказаў кіраўнік САЗ Тэдрас Адханам Гебрэесус.