У Вільні адкрылі «акно жыцця» для лекараў
7- 22.03.2020, 14:17
- 12,803
![У Вільні адкрылі «акно жыцця» для лекараў](https://i.c97.org/ai/370352/aux-head-1584875828-20200321_litwa_corona_360.jpg)
Жыхары горада могуць ахвяраваць сродкі спецабароны медыкам
У Вільні з'явілася «акно жыцця для лекараў» - спецыяльны кантэйнер, у якім жыхары горада могуць пакінуць сродкі спецабароны для лекараў, паведамляе карэспандэнт Charter97.org у Вільні.
«Пасля першых навін аб распаўсюдзе віруса ў Кітаі многія жыхары змаглі набыць сродкі індывідуальнай абароны, якія падчас карантыну, імаверна, застануцца нявыкарыстанымі, але з'яўляюцца жыццёва важнымі для медыцынскага персаналу», - сказаў мэр горада Рэмігіюс Шымашус.
У адмысловым кантэйнеры жыхары горада могуць пакінуць ахоўныя маскі розных тыпаў, рэспіратары тыпаў FFP2 і FFP3, якія захоўваюцца ў непашкоджанай упакоўцы. Акрамя таго, жыхары могуць ахвяраваць ахоўныя камбінезоны з каптурамі, ахоўныя шчыткі і акуляры, бахілы, гумовыя пальчаткі, ахоўныя фартухі і аднаразовыя шапачкі.
Ахвяраванні трэба герметычна спакаваць. На кантэйнеры ёсць інструкцыя, як пакінуць ахвяраванне пры захаванні гігіенічнасці.
На гэтым тыдні Кітай падарыў Літве 20 тысяч медыцынскіх масак і 120 тысяч пар пальчатак. Гуманітарную дапамогу накіравала Гандлёвая палата Кітая і кампанія Huawei.
20 сакавіка Літва закупіла ў Кітая сродкі спецабароны для медыкаў – 5,7 млн аднаразовых масак, 1,8 млн рэспіратараў, 1,8 млн аднаразовых шапак і халатаў, 1 млн аднаразовых камбінезонаў з каптурамі, 3,6 млн аднаразовых бахілаў.
На раніцу 22 сакавіка ў Літве зафіксаваныя 105 выпадкаў каранавірусу. Адна пацыентка з каранавірусам памерла.
З 16 сакавіка ў Літве на два тыдні ўведзены карантын. Закрытыя мяжы, скасаваныя ўсе мерапрыемствы, не працуюць крамы, акрамя прадуктовых і аптэк.