СААЗ аб каранавірусе: У многіх людзей сімптомы COVID-19 праяўляюцца вельмі слаба
17- 22.03.2020, 16:15
- 55,490
![СААЗ аб каранавірусе: У многіх людзей сімптомы COVID-19 праяўляюцца вельмі слаба](https://i.c97.org/ai/368425/aux-head-1583501973-202020306_korkna_t.jpg)
Практычныя парады, якія дапамогуць перажыць эпідэмію.
Сярод усіх структур Сусветная Арганізацыя Аховы здароўя, мабыць, выклікае найбольшы давер у пытаннях, звязаных з барацьбой з каранавірусам, піша журналіст «Эха Москвы» Уладзімір Варфаламееў. У арганізацыі ёсць расейскамоўны сайт, а на ім - нямала практычнай інфармацыі, якая можа дапамагчы нам спакойна перажыць эпідэмію.
Нашэнне масак
Вам варта насіць маску толькі ў тым выпадку, калі ў вас ёсць сімптомы COVID-19 (асабліва кашаль) або калі вы ажыццяўляеце дагляд за чалавекам, які можа быць хворы на COVID-19. Калі ў вас няма сімптомаў захворвання, выкарыстанне маскі будзе нерацыянальным. Цяпер у свеце адзначаецца дэфіцыт масак, таму СААЗ заклікае ўсіх да беражлівага выкарыстання.
Захаванне дыстанцыі
Захворванне можа перадавацца праз дробныя кроплі, якія выдзяляюцца з носа або рота хворага на COVID-19 пры кашлю або чханні. Гэтыя кроплі трапляюць на навакольныя прадметы і паверхні, якія атачаюць чалавека. Акрамя таго, заражэнне можа адбыцца пры ўдыханні дробных кропель пры кашлю або чханні. На гэтую прычыну важна трымацца ад хворага чалавека на адлегласці больш за 1 метр.
Нашэнне пальчатак
Нашэнне гумовых пальчатак у грамадскіх месцах у якасці захаду прафілактыкі неэфектыўнае. Вы ў большай ступені абаронены ад COVID 19, калі не карыстаецеся гумовымі пальчаткамі, але мыеце рукі, чым калі носіце пальчаткі. COVID 19 можа забрудзіць гумовыя пальчаткі. Датыкаючыся пасля гэтага да твару, вы перанесяце вірус з паверхні пальчатак на твар і рызыкуеце заразіцца.
Мыццё рук
Рэгулярна апрацоўвайце рукі спіртазмяшчальным сродкам або мыйце іх з мылам. Калі на паверхні рук прысутнічае вірус, то апрацоўка рук спіртазмяшчальным сродкам або мыццё іх з мылам заб'е яго. Рэгулярнае мыццё рук з'яўляецца найлепшым спосабам індывідуальнай абароны ад COVID-19.
Адсутнасць сімптомаў
Рызыка заражэння ад чалавека, які не мае ніякіх сімптомаў, вельмі нізкая. З іншага боку, у многіх людзей сімптомы COVID-19 праяўляюцца вельмі слаба. Гэта асабліва характэрна для ранніх стадый захворвання. Такім чынам, рызыка перадачы COVID-19 ад чалавека, які не адчувае сябе хворым і мае толькі слабы кашаль, існуе.
Сканеры тэмпературы
Цеплавыя сканеры дазваляюць эфектыўна выяўляць тых людзей, у якіх у выніку заражэння новым каранавірусам (COVID-19) развілася ліхаманка (падвышаная тэмпература цела). Аднак выявіць заражаных людзей да стадыі ліхаманкі з дапамогай гэтай тэхналогіі нельга. З моманту заражэння да павышэння тэмпературы праходзіць ад двух да дзесяці дзён.
Пастанова пра самаізаляцыю
Калі вы адчулі недамаганне, заставайцеся дома да выздараўлення, нават калі ў вас слаба выяўленыя сімптомы захворвання, напрыклад, галаўны боль, субфебрыльная тэмпература (37,3°C або вышэй) або невялікі насмарк.
Захаванне карантыну
Для большасці людзей у большасці рэгіёнаў рызыка заражэння COVID-19 па-ранейшаму малая. Аднак, пры наяўнасці ўведзеных на мясцовым узроўні абмежаванняў на паездкі, перасоўванне ці масавыя мерапрыемствы, шануйце гэты рэжым. Пры выкананні захадаў кантролю за распаўсюджваннем захворвання вы можаце скараціць рызыку заражэння або распаўсюджвання COVID-19.
Самалячэнне
Шэраг сродкаў заходняй медыцыны, а таксама традыцыйных народных або хатніх сродкаў можа спрыяць паляпшэнню самаадчування і аблягчэнню сімптомаў захворвання на COVID-19, аднак, цяпер няма фактычных звестак, якія б маглі сведчыць аб тым, што дзеянне якога-небудзь з наяўных прэпаратаў дазваляе прадухіліць ці лячыць гэтае захворванне. СААЗ не рэкамендуе праводзіць самалячэнне з дапамогай якіх бы там ні было лекавых прэпаратаў.
Шпіталізацыя
Пацыенты з лёгкім цячэннем хваробы, напрыклад, субфебрыльнай тэмпературай цела, кашлем, насмаркам або болем у горле без наяўнасці трывожных сімптомаў, такіх як задышка ці абцяжаранае дыханне, павелічэнне сакрэцыі дыхальных шляхоў (г.зн. аддзяленне макроты або крывахарканне), а таксама без парушэнняў свядомасці, падлягаюць шпіталізацыі толькі пры наяўнасці боязі ў сувязі з магчымым хуткім пагаршэннем іх стану.