Наступствы «цукровай справы»: Што адбываецца на камбінаце ў Слуцку

У горадзе развальваецца чарговая вытворчасць.

Пасля навіны пра тое, што Слуцкі цукрарафінадны камбінат у гэтым сезоне не зможа аказаць спонсарскую дапамогу СФК «Слуцк», случчакі зноў загаварылі пра лёс прадпрыемства. Яшчэ з канца студзеня, калі на ўсю краіну прагрымела т.зв. «Цукровая справа» многія перажываюць, што ў горадзе разваліцца чарговая вытворчасць.

Пра тое, як ідуць справы на прадпрыемстве, «Кур'еру» распавёў Восіп Дапіра, старшыня назіральнай рады Слуцкага цукроварафінаднага камбіната.

Хто цяпер кіруе камбінатам?

- Абавязкі дырэктара выконвае Руслан Лемеш, галоўны інжынер.

Калі будзе прызначэнне новага дырэктара?

- На назіральную раду гэтае пытанне будзе вынесенае пасля ўзгаднення кандыдатуры паміж «Белдзяржхарчпрамам», Cавета Міністраў і Мінаблвыканкамам. Калі дадуць кандыдатуру на зацвярджэнне наглядальнай рады - пакуль невядома.

Якія яшчэ на цукровым камбінаце былі кадравыя перастаноўкі?

- На мінулым тыдні пачаў працаваць новы намеснік дырэктара камерцыйных пытанняў - Віталь Маркавец. Да гэтага ён кіраваў Старадарожскім плодаагароднінным заводам, які належыць цукроваму камбінату.

Паводле вынікаў 2018 года з чатырох цукровых заводаў Беларусі толькі слуцкі паказаў прыбытак. Як спрацавалі летась?

- Мінулы год мы скончылі добра. З прыбыткам. Мы вельмі мала ў канцы года прадавалі цукру. Спадзяваліся на паляпшэнне кошту, але гэтага не адбылося.

Якая зараз эканамічная і вытворчая абстаноўка на камбінаце? Кажуць, што з пачатку года не было ні адной адгрузкі на экспарт...

- Не, гэта не так. Адгрузкі праводзяцца. Прычым не толькі ў Расею, але і ў краіны Еўропы. Вось толькі аб'ёмы значна меншыя за леташнія і продажы ідуць са стратай. Моцна ўпалі цэны праз перавытворчасць цукру. Вядома, усе перажываюць. У нас вялікія запасы цукру, а ў Беларусь завезена шмат расейскага.

Значна зменшыліся: гэта на колькі? І з чым гэта звязана?

- Дакладных лічбаў пакуль назваць не магу. Звязана гэта з вельмі нізкай цаной на цукар. Продажы з вялікім стратай небяспечныя наступствамі. Таму і малыя продажы. Шукаем, дзе стратаў менш.

А ці ёсць праблема з мяшкамі? Ходзяць размовы, што праз скандальную справу цяпер няма ў што адгружаць цукар...

- Праблем няма. Мы з сіласаў цукар забіраем толькі на фабрыку фасоўкі. У мяшкі «не затарваем», каб хапіла цукру для расфасоўкі. Ужо спакаванага ў мяшкі цукру ў нас вялікія запасы. Было б куды грузіць.

Цяпер камбінат працуе на поўную магутнасць?

- Цяпер камбінат знаходзіцца на рамонце пасля сезону перапрацоўкі буракоў. Рыхтуемся да сезону перапрацоўкі сіропу, назапашанага ў трох ёмістасцях па 40 тысяч тон. Перапрацоўку пачнём у першыя дні траўня. З яго атрымаем звыш 70 тысяч тон цукру.