Венесуэльскі генерал здаўся ЗША
9- 28.03.2020, 10:41
- 23,780
![Венесуэльскі генерал здаўся ЗША](https://i.c97.org/ai/266518/aux-head-1508437210-flag_venesuely_360.jpg)
Ён праходзіць паводле справы пра гандаль наркотыкамі разам з Нікаласам Мадурам.
Супрацоўнікі Упраўлення барацьбы з наркотыкамі ЗША (DEA) вылецелі ў Калумбію, каб арыштаваць Клівера Алкалу Карданеса, адстаўнога венесуэльскага генерала, якога ЗША абвінавачваюць у наркатэрарызме, паведамляе «Голос Америки».
Пра гэта агенцтву Reuters паведамілі дзве крыніцы ў DEA, знаёмыя з аперацыяй.
За дзень да гэтага ЗША абвінавацілі незаконнага кіраўніка Венесуэлы Нікаласа Мадура, Алкалу і яшчэ больш за дзесяць высокапастаўленых венесуэльскіх службовых асоб у «наркатэрарызме». Дзярждэпартамэнт ЗША абвясціў пра ўзнагароду сумаю да 10 млн даляраў за інфармацыю, якая дапамагла б арыштаваць Алкалу.
Генеральны пракурор ЗША Уільям Бар абвінаваціў Мадура і блізкіх да яго асоб у злачыннай змове з калумбійскай тэрарыстычнай групоўкай ФАРК з мэтай «затапіць Злучаныя Штаты какаінам».
Паводле непацверджаных звестак, Алкала добраахвотна здаўся DEA і пагадзіўся супрацоўнічаць з абвінавачваннем.