30 сакавiка 2020, панядзелак, 18:23
Народны карантын
Рубрыкі

У Менску запусцілі сэрвіс параўнання коштаў у крамах

5
У Менску запусцілі сэрвіс параўнання коштаў у крамах
ІЛЮСТРАЦЫЙНАЕ ФОТА

Ён дазваляе ў рэжыме рэальнага часу адсочваць, дзе і якія прадукты таннейшыя.

У Менску запрацаваў бясплатны сэрвіс InfoPrice у параўнанні коштаў тавараў у крамах розных сетак, піша «Народная воля». Ён дазваляе ў рэжыме рэальнага часу адсочваць, дзе і якія прадукты таннейшыя.

У сэрвісе прадстаўлены дзясяткі тысяч тавараў. Можна параўнаць кошт канкрэтнага прадукту ў розных сетках або вывучыць усю катэгорыю. Пакуль распрацоўшчыкі аблічбавалі асартымент чатырох буйных рытэйлераў - «Еўраопт», «Гіпа», «Карона» і «Green». Неўзабаве ў InfoPrice з'явяцца і іншыя гандлёвыя сеткі.

Тавары ў сэрвісе можна знайсці праз каталог або з дапамогай пошуку па назве ці штрых-коду. Усе яны адсартаваныя па таварных групах. Акрамя кошту, сістэма падказвае месца і дзень маніторынгу.

Неўзабаве ў сэрвісе з'явіцца прадуктовы кошык. Сярод іншага, прапануюць выбраць розныя тавары і параўнаць агульныя чэкі ў розных сетках. Яшчэ адной «фішкай» стане ўбудаваны ў дадатак «разумны» сканер. Можна будзе паднесці смартфон да тавару і супаставіць кошты яго ў іншых сетках.

Пакуль што можна параўноўваць кошты толькі ў крамах Менска. Хоць звесткі актуальныя і па-за сталіцай: гандлёвыя сеткі, як правіла, маюць адзіныя кошты па ўсёй краіне. У будучыні сэрвіс можа ахапіць і рэгіёны - перш за ўсё, абласныя цэнтры.

Тавары адсочваюць штодня - гэтым займаецца асобная каманда. «Тайныя пакупнікі» выкарыстоўваюць адмысловыя прылады, якія аўтаматычна счытваюць штрыхкоды і абнаўляюць базу звестак. Пасля гэтага застаецца толькі ўнесці кошт тавару. Ноў-хаў дазваляе счытваць у разы больш тавараў, чым «па-старому».

Распрацоўнікі InfoPrice займаюць незалежную пазіцыю ў дачыненні да рытэйлераў. Так што тавары ў крамах адсочваюць аднолькава скрупулёзна. З некаторымі сеткамі ёсць папярэднія дамоўленасці аб паведамленні коштаў - так яны змогуць кантраляваць актуальнасць звестак у сэрвісе. Аднак падчас маніторынгу кошты ўсё роўна пераправяраюць.

Сэрвісам можна карыстацца проста ў браўзэры на смартфоне або кампутары. Днямі таксама стане даступны мабільны дадатак у Google Play.