Яшчэ ў двух дзіцячых садках Менска выявілі каранавірус
6- 10.04.2020, 17:11
- 21,441
Ужо ў шасці дзіцячых садках сталіцы зафіксаваная інфекцыя.
Яшчэ ў двух садках Менску выявілі каранавірус. У садку №119 захварэў малы, у №105 - супрацоўнік. Гэтую інфармацыю пацвердзілі ў саміх садках.
У рэдакцыю tut.by звярнулася Людміла (на просьбу гераіні імя змененае). Яе дзіця ходзіць у садок №119 Менска. Установа знаходзіцца на вуліцы Янкі Брыля. Учора, кажа суразмоўца, ім паведамілі, што ў хлопчыка з іх групы тэст на каранавірус даў станоўчы вынік.
- Уначы дзіця забралі ў лякарню, - распавядае суразмоўца. - Сказалі, ягоная мама захварэла. Яе праверылі на COVID-19, ён пацвердзіўся. Затым тэсты зрабілі сям'і, і ў малога ён таксама станоўчы. Апошнім разам дзіця было ў садку ў мінулую пятніцу. Дзетак, выхавацелек і нянек папрасілі знаходзіцца ў самаізаляцыі. Сёння павінны ўзяць мазкі.
Мама кажа, што ў іх вельмі добры сад. У сувязі з эпідэміялагічнай сітуацыяй у групах заўсёды ўсё старанна апрацоўвалі.
- Наколькі мне вядома, пра тое, што ў мамы хлопчыка каранавірус, стала вядома ў пятніцу, і ў суботу садок апрацоўвалі. Але чаму бацькоў не папярэдзілі пра сітуацыі, якая склалася? З панядзелка некаторыя сем'і прадаўжалі вадзіць дзяцей у сад.
У садку тлумачаць, што ніякай інфармацыі ад бацькоў яны не штойвалі.
- У чацвер удзень нам афіцыйна паведамілі, што ў дзіцяці пацвердзіўся каранавірус, - каментуюць сітуацыю ў дзіцячым садку. - Мы тут жа сталі абзвоньваць бацькоў.
- Бацькі кажуць, што сад яшчэ ў мінулую пятніцу ведаў, што мама дзіцяці нездаровая.
- Цяпер вельмі шмат чутак, таму мы працуем толькі з афіцыйнымі крыніцамі, - кажуць у садку. Пра маму хлопчыка, тлумачаць, яны не ведалі.
Яшчэ адзін выпадак COVID-19 выяўлены ў супрацоўніка дзіцячага садка №105. Установа знаходзіцца на вуліцы Алібегава.
- Каранавірус пацвердзіўся ў аднаго з супрацоўнікаў. Апошні раз ён быў на працы 1 красавіка, - распавядае чытач. - Потым у яго паднялася тэмпература. Пазней высветлілася, што ў аднаго з ягоных сваякоў тэст на каранавірус даў станоўчы вынік. Праверылі і яго. Выявілася, каранавірус.
Цяпер, прадаўжае суразмоўца, мужчына ў лякарні. На працы ён кантактаваў з трыма супрацоўнікамі. Ім зрабілі тэсты, цяпер яны дома на самаізаляцыі.
- У аднаго з нашых работнікаў пацвердзіўся тэст на каранавірус, - пацвердзілі ў садку. - Да гэтага ён не хадзіў на працу.
Трое супрацоўнікаў, з якімі мужчына кантактаваў, на самаізаляцыі. Астатнія супрацоўнікі адчуваюць сябе добра і працуюць. Сад апрацавалі, дзеці прадаўжаюць хадзіць у групы.
Нагадаем, учора стала вядома, што ў чатырох дзіцячых садках Менска выяўленыя выпадкі каранавірусу.