The New Times: Клінікі Менска і Віцебска загачаныя неверагоднай колькасцю хворых з пнеўманіяй

Замежнае выданне напісала пра сітуацыю з эпідэміяй у Беларусі.

Улады Беларусі ўпарта не ўводзяць карантын, не касуюць масавыя мерапрыемствы і не даюць адэкватную статыстыку колькасці хворых COVID-19. Шпіталі запоўненыя пацыентамі з пнеўманіяй, а Лукашэнка «вынаходзіць» усё новыя лекі ад заразы. Пра жыццё ў Беларусі без карантыну напісала расейскае выданне The New Times.

Дзяржаўныя беларускія СМІ пра эпідэмію імкнуцца пісаць як мага менш, затое тэлеграм-каналы запоўненыя фатаграфіямі з перапоўненых клінік і крыкамі аб дапамозе - як ад лекараў, так і ад хворых.

«У НАС УСЁ ДОБРА»

1 красавіка Прэзідэнт Літвы Гітанас Наўседа заявіў журналістам: «Мы не можам давяраць гэтай інфармацыі, якую атрымліваем афіцыйна з Беларусі, бо я мяркую, што беларускі кіраўнік ацэньвае сітуацыю з пэўнай бравадай. Цалкам магчыма, што сапраўдная статыстыка значна горшая, бо мы ведаем пра пэўныя асяродкі на беларускай тэрыторыі і выпадкі смерці, якія фіксуюцца».

Літоўскія ўлады далі зразумець, што пасля заканчэння карантыну еўрапейскія краіны адкрыюць межы паміж сабой, але могуць не адкрыць мяжы з Беларуссю. Таму што ніхто не ведае рэальную эпідэміялагічную абстаноўку ў краіне. Лукашэнка адказаў у тыповай для яго хамскай манеры: «Калі ўжо давядзецца дзесьці «тушыць пажа», мы яго будзем тушыць. І значна больш эфектыўна, чым літоўскі прэзідэнт».

Беларусь - адная з нешматлікіх еўрапейскіх краін, дзе ўлады доўгі час адмаўляліся ад якіх-небудзь карантынных захадаў. Мала таго, у першыя тыдні эпідэміі Лукашэнка называў COVID-19 «псіхозам», рэкамендаваў лячыцца гарэлкай, лазняй і працай у полі. Пазней да «лекаў» дадаліся гульня ў хакей, шпацыры на свежым паветры, масла. У сваю чаргу, міністр аховы здароўя Уладзімір Каранік прапанаваў беларусам лячыцца ад каранавіруса «вясной, спатканнямі і станоўчымі эмоцыямі».

Карантын не ўводзіўся. У школах і ВНУ да пачатку красавіка працягваліся заняткі. Хоць у многіх класах на ўрокі ходзяць усяго па два-тры вучні - астатніх сем'і трымаюць дома. Бацькі школьнікаў аб'ядноўваюцца ў чатах у мэсэджары Viber і дамаўляюцца дзейнічаць супольна - у выніку часам дырэктар школы атрымлівае ад бацькоў усяго класа заяву з просьбай перавесці іх дзяцей на надомнае навучанне.

Толькі да канца мінулага тыдня Лукашэнка абвясціў, што дае школьнікам тыдзень вакацый. Гэта значыць ніякага карантыну - проста больш доўгія вясновыя вакацыі.

Студэнтам складаней: іх адсутнасць на занятках адміністрацыі ВНУ часта пагражаюць прызнаць «сабатажам». Аднак некаторыя інстытуты пустыя з іншай прычыны - іх студэнты масава адпраўленыя ў шпіталі як кантакты з каранавіруснымі хворымі або закрытыя ў інтэрнатах.

Але масавыя мерапрыемствы ўлады не касуюць. Ідзе падрыхтоўка да парада Перамогі 9 траўня. 19 сакавіка стартаваў чэмпіянат Беларусі ў футболе, і стадыёны адкрытыя для наведвання заўзятараў.

14 і 28 сакавіка ва ўсёй краіне прайшлі гарадскія суботнікі. Працягваецца падрыхтоўка да музычнага фестывалю «Славянскі базар». Працуюць кінатэатры, гандлёвыя цэнтры, кавярні і рэстарацыі. Большасць абслуговага персаналу - без масак і пальчатак. Неафіцыйна яны прызнаюцца, што ім «настойліва раілі» не выкарыстоўваць маскі, каб «не правакаваць паніку сярод насельніцтва» (зрэшты, у Туркменіі за нашэнне масак і зусім арыштоўваюць).

Схаваная інфармацыя

З 1 сакавіка ўпершыню ў Беларусі была зменшаная дапамога на пахаванне (пахаванне), прычым на значную для краіны суму - адразу на 50 еўраў. Адразу пайшлі чуткі, што ўлады рыхтуюцца да масавых смерцяў, найперш пенсіянераў, як найбольш уразлівых да каранавіруса.

Пры гэтым лекараў масава прымушаюць падпісваць паперы «пра невыдаванне таямніцы», КДБ і іншыя сілавыя ведамствы пагражаюць распачынаннем крымінальных спраў, калі інфармацыя пра каранавірусных хворых выйдзе на свет. Лекары згодныя даваць гэтую інфармацыю цяпер толькі ананімна.

18 сакавіка ў Віцебску памерла жанчына - яе хавалі ў закрытай труне, забаранілі запрашаць каго-небудзь на пахаванне. Праз дзень ейны муж, нявестка і суседка далі інтэрв'ю незалежным журналістам, распавёўшы пра знойдзены ў жанчыны каранавірус. 21 сакавіка Лукашэнка даручыў старшыні КДБ Валерыю Вакульчыку «жорстка разабрацца з нягоднікамі, якія ўкідваюць фальшывую інфармацыю пра вірус».

Міністэрства аховы здароўя Беларусі не дае поўнай статыстыкі захворванняў COVID-19 па абласцях і гарадах. Якія-небудзь канкрэтныя лічбы на сайце ведамства адсутнічаюць. У тэлеграм-канале міністэрства выдаюцца звесткі з затрымкай на два-тры дні. Прэс-рэлізы Міністэрства аховы здароўя нагадваюць задачы ў арыфметыцы, і дакладная колькасць тых, хто захварэў не паказваецца.

Улады рапартуюць аб тым, што ахоўных сродкаў у лішку, але на месцах іх катастрафічна не стае. Купіць маску ў звычайнай аптэцы нават у Менску амаль немагчыма. Большасць людзей на вуліцах і ў крамах - без масак, ніякіх афіцыйных прадпісанняў на гэты конт няма.

Таксама з усёй Беларусі ідуць скаргі, што ўлады не бяруць тэсты і ставяць розныя дыягназы, афіцыйна не звязаныя з каранавірусам, таму адсачыць дакладную колькасць тых, хто захварэў складана. Хворым ставяць дыягназ ВРВІ, пнеўманія, бранхіт і г.д. Пры гэтым бальніцы Менска і Віцебска загачаныя неверагоднай колькасцю хворых з пнеўманіяй, іх у шмат разоў больш, чым звычайна. Пад Менскам цяпер для хворых вызваляюць шпіталі ў гарадах-спадарожніках.

23 сакавіка Міністэрства аховы здароўя пацвердзіла выпадак захворвання каранавірусам у 58-гадовай жыхаркі Жыткавічаў, якая да гэтага тыдзень была на лістку непрацаздольнасці з дыягназам ВРВІ, а 21 сакавіка страціла прытомнасць, выходзячы з паліклінікі. Але ўжо 25 сакавіка Міністэрства аховы здароўя паведаміла, што гэтая жанчына каранавірусам не хворая, а ейным калегам было забаронена камунікаваць з журналістамі пад пагрозай санкцый.

ГОРАД, ЗАКРЫТЫ ДЛЯ МІЛІЦЫІ

Самая цяжкая сітуацыя - у Віцебску і вобласці. Рэгіён закрылі нават для міліцыі: выезд абласным міліцыянтам забаронены, усім іншым - забаронены ўезд. Віцебскія лекары ў інтэрнэце пішуць пра тое, што сітуацыя выходзіць з-пад кантролю.

«99% тых, каго забіраюць у стацыянары ў Віцебску цяпер - хворыя з паражэннем лёгкіх і высокай тэмпературай. Іншых амаль не бяром, у нас ужо нават гінеколагі сталі пульманолагамі, - сказала журналісту The News Times адна з віцебскіх лекарак. - Лякарні рэальна перапоўненыя, людзі ляжаць у калідорах. Усе лекары паміж сабой гавораць, што гэта каранавірус, але мясцовае Міністэрства аховы здароўя не дазваляе псаваць статыстыку. Але гэтая пнеўманія дакладна не падобная да папярэдніх!»

Віцебск стаў адным з эпіцэнтраў эпідэміі пасля таго, як у яго вярнулася вялікая група турыстаў, якія пабывалі ў Італіі.

Цяпер нават Лукашэнка быў вымушаны прызнаць, што ў Віцебску - асабліва складаная сітуацыя, і COVID-19 там захварэлі больш за 10 лекараў. Ужо некалькі разоў у інтэрнэце з'яўляліся чуткі, што сам Віцебск ізаляваны, але яны пакуль не пацвярджаліся. Тым не менш пытанне: «Ці ўдалося вам выехаць з Віцебска?» - працягвае задавацца ў сацыяльных сетках.

Неафіцыйна з дыспансераў для псіхічна хворых і іншых профільных клінік ва ўсёй Беларусі, а таксама профільных аддзяленняў у шпіталях пачынаюць масава выпісваць пацыентаў. Са слоў лекараў, рыхтуюцца да наплыву хворых на пнеўманію.