Гішпанскія медыкі назвалі пяць новых сімптомаў каранавірусу

Стала вядома, як хвароба праяўляецца на скуры.

Адным з сімптомаў каранавірусу могуць быць розныя высыпанні на скуры, прыходзіць да высновы шэраг лекараў і навукоўцаў. Так, даследнікі з Гішпанскай акадэміі дэрматалогіі склалі класіфікацыю праяваў COVID-19 на скуры чалавека.

Як гаворыцца ў публікацыі ў British Journal of Dermatology, у 19% выпадкаў з'яўлення скурных сімптомаў у хворых на каранавірус пацыентаў з'яўляліся бурбалкі або пачырваненні, як пры абмаражэнні – найчасцей на пальцах рук і ног. Найчасцей такія высыпанні былі заўважаныя ў маладых пацыентаў з лёгкай формай хваробы.

Таксама ў 19% выпадкаў высыпанні на скуры ў пацыентаў былі падобныя на крапіўніцу і амаль заўсёды (у 92%) выклікалі сверб. Такі сып назіралі ў цяжкахворых, пераважна на целе, часам – на далонях.

У палове выпадкаў (47%) скурныя сімптомы выяўляліся як пляміста-папулезны сып, падобны на ружовы лішай. Часам высыпанне суправаджалася пурпурам (капілярныя кровазліцці ў скуру) і часцей выклікала сверб. Сімптом уласцівы цяжкахворым пацыентам.

У 9% выпадкаў скурныя праявы выглядалі як пухірковы сып – з дробных пухіркоў – на целе. У больш чым палове выпадкаў сып суправаджаўся свербам, часам "пухіркі" напаўняліся сукравіцай. Такія сімптомы часцей назіралі ў пацыентаў сярэдняга ўзросту і пры адносна цяжкім праходжанні захворвання.

Радзей за ўсё (6%) пры праяве на скуры – у пажылых пацыентаў з цяжкай формай хваробы – назіраўся некроз (адміранне тканкі) або ліведа (сінюшная афарбоўка скурных пакроваў праз сасудзістую "сетачку").