САЗ адправіць у Кітай місію, каб высветліць паходжанне COVID-19
4- 26.05.2020, 10:43
- 10,448
У расследаванні возьмуць удзел прадстаўнікі розных краін.
Сусветная арганізацыя здароўя мае намер адправіць у Кітай місію для вывучэння паходжання каранавіруса.
Пра гэта падчас брыфінгу заявіў дырэктар праграмы САЗ у надзвычайных сітуацыях у галіне аховы здароўя Майкл Раян.
«Мы знаходзімся ў працэсе абмеркавання з нашымі калегамі з Кітая. Наколькі я разумею, пакуль канкрэтная дата навуковай місіі не вызначаная», - сказаў ён.
Паводле ягоных слоў, у місіі возьмуць удзел навуковыя прадстаўнікі з розных краін.
Раян заявіў, што задача місіі будзе ва ўсталяванні паходжання віруса. Ён дадаў, што Кітай даў сігнал аб гатоўнасці да такога падыходу.
У сваю чаргу, генеральны дырэктар САЗ Тэдрос Аданам Гебрэесус адзначыў, што шляхам вывучэння паходжання віруса, можна будзе прадухіліць ягонае з'яўленне ў будучыні.
Распаўсюджванне каранавіруса пачалося ў снежні 2019 года ў горадзе Ухань у Кітаі.
Зараз ідуць спрэчкі пра месца і прычыны ўзнікнення каранавіруса.
Са звестак кітайскіх СМІ, першым чалавекам, у якога пацвердзіўся каранавірус, была Прадавачка крэветак на рынку морапрадуктаў Хуанань у кітайскім горадзе Ухань.
Сусветная арганізацыя здароўя падтрымлівала гэтую версію, але нядаўна дапусціла, што распаўсюджванне каранавіруснай інфекцыі магло пачацца і не на рынку ва Ухані.
Прэзідэнт ЗША Дональд Трамп абвінавачвае Кітай у распаўсюдзе вірусу. Ён не аднойчы заяўляў, што сотні тысяч людзей ва ўсім свеце загінулі праз некампетэнтнасць Кітая, з якога пачалася пандэмія.
Брытанская газета The Daily Telegraph апублікавала даклад, у якім гаворыцца, што ўлады Кітая цягам доўгага часу хавалі і знішчалі звесткі пра выбух каранавіруса ва Ухані. Да такой высновы прыйшлі выведкі пяці заходніх краін.