«Падзенне прыбытку перавышае 100%»

З рахункаў ІП, якія арандуюць плошчы на заводзе «Гарызонт», прымусова спісваюць грошы за арэнду.

Былыя корпусы завода «Гарызонт» у цэнтры Менска на вуліцы Куйбышава атрымалі другое жыццё гады чатыры таму, калі пустыя завадскія плошчы сталі займаць невялікія прыватныя кампаніі. Сёння іх тут блізу 100 - мноства танцавальных студый, фотастудый, студыі выяўленчага мастацтва, квэст-румаў, майстэрняў дызайнераў і іншых малых бізнэсаў. Яны арандуюць плошчы не ў самога завода, а ў прыватнай кампаніі «Гарызонт-Белінвест-дэвелапер». І ўжо больш за месяц не могуць дамовіцца пра зніжкі ў арэндзе. Без іх гэтым бізнэсам, якія сталі ў эпоху каранакрызіса стратнымі, ніяк не справіцца, піша kp.by.

Каб знайсці кампрамісны варыянт, два дзясяткі арандатараў прыйшлі 27 траўня на сустрэчу з прадстаўнікамі кампаніі «Гарызонт-Белінвест-дэвелапер». У будынак арганізацыі, спасылаючыся на эпідэміялагічную сітуацыю ў краіне, усіх не пусцілі - на сустрэчу пайшлі двое прадстаўнікоў. Тых бізнэсоўцаў, хто застаўся ля ўваходу, ахова заклікала разысціся і прыстрашыла выклікаць міліцыю за незаконнае масавае мерапрыемства. Ніхто не сышоў, міліцыю ў выніку таксама выклікаць не сталі. Але было відаць, што стасункі паміж арандатарамі і арэндадаўцамі дайшлі да мяжы.

- З нашых рахункаў у прымусовым парадку з мінулага тыдня пачалі спісваць сродкі ў кошт выплаты неаплачанай арэнднай платы. Гэта сродкі на выплату заробкаў, падтрыманне бягучай дзейнасці, - распавядае Віталь, які меў адзін з квэст-румаў. - Прэзідэнт сказаў нікога не звальняць, але каб не звальняць людзей, трэба ім плаціць заробак, а для гэтага патрэбныя сродкі на рахунках. Цяпер у нас іх няма. Як мы можам цяпер гэта выканаць?

З яго слоў, многія з арандатараў настроены на пошук кампраміснага развязання, але знайсці яго не атрымліваецца, а тым часам падзенне прыбытку перавышае 100%, бо прыйшлося вяртаць грошы за ўжо раней набытыя сертыфікаты. Арандатары кажуць, што ў такіх умовах ім неабходная істотная зніжка: адны кажуць пра 90%, іншыя былі б рады і 30%.

«Цяпер пераапрануся і пайду падлогі мыць»

У некаторых прадпрымальнікаў на фоне пандэміі сітуацыя блізкая да крытычнай.

- Мой муж атрымаў заробак нядаўна, з яго мы заплацілі 300 рублёў за электрычнасць, таму што ўжо сталі абразаць святло. Не заплацілі б - як бы мы без святла працавалі? - падключаецца да размовы ўладальніца міні-кавярні Валянціна, якая стаіць побач. - Зараз хоць круціся, хоць лясні, хоць начуй на працы, усё роўна нічога не заробіш, таму што народу няма; 3 - 4 чалавекі ў дзень. Пойдзе народ, будзе даход, будзе аплата своечасовая. А цяпер дзе грошы ўзяць? Нават калі я пайду з гэтых плошчаў, мне ўсё роўна трэба ўжо заплаціць 3000 рублёў, якія накапалі за два месяцы. І з кожным днём будзе больш, а калі яшчэ пеню выставяць?

Яна распавядае, што максімальна скараціла выдаткі ва ўстанове: сама мые посуд і прыбірае падлогі, таму што пасудамыйцы плаціць няма чым. Бармэн ва ўстанове працуе па пару гадзін.

- Я працую адна, бармэн прыходзіць на пару гадзін, таму што чым мне яму плаціць? Пасудамыйка наогул сядзіць дома. Я сама посуд мыю. Зараз прыйду з сустрэчы, пераапрануся і пайду падлогі мыць, - кажа Валянціна. - У людзей няма грошай цяпер, яны б і рады нешта купіць. І нават калі ў каго і ёсць рублік, то ён яго лепш адкладзе на чорны дзень, каб без хлеба не застацца потым. Калі раней даход у дзень быў 400, цяпер 40. Часам, у добрае надвор'е, падымаецца да 60 - 70, але калі ён паднімецца да 400 зноў? А арэнда і камунальныя кожны месяц капаюць.

«Скасоўваем дамову, мы гатовыя на гэта пайсці»

Практычна праз гадзіну чакання з будынка выходзіць ўладальнік гульнявой прасторы Юры Алейнік, які хадзіў на сустрэчу з прадстаўнікамі арэндадаўцаў.

- Прапановы з іх боку канкрэтнай няма. На словах нам прапанавалі падоўжыць фіксацыю курсу еўра на 1 сакавіка да 1 верасня і знізіць арэндную плату на 10%, - пераказаў ён вынік сустрэчы. - Яны не могуць пайсці на большае зніжэнне, таму што ў іх будуць страты. На пытанне аб тым, што грошай няма плаціць высокую арэнду, нам сказалі: «скасоўваем дамову, мы гатовыя на гэта пайсці, хоць дамова не прадугледжвае скасаванне ў аднабаковым парадку».

Што далей будуць рабіць арандатары, пакуль невядома, яны цяпер абдумваюць агульную пастанову. Некалькі з іх ужо гатовыя скасоўваць дамовы і сыходзіць з плошчаў.