Як у Менску развітваюцца з народным Героем Беларусі

Беларусы стаяць па абодва бакі вуліцы, у ланцугах, з кветкамі і бел-чырвона-белымі сцягамі.

Сёння ў Менску праходзіць развітанне з Аляксандрам Тарайкоўскім, загінулым 10 жніўня на вуліцы Прытыцкага, дзе сілавікі брутальна разагналі акцыю пратэсту, піша tut.by. Сям'я развітваецца з ім на Альшэўскага (туды таксама прыйшлі многія мянчане), жыхары горада ж сабраліся на месцы гібелі мужчыны на Пушкінскай.

У пасведчанні аб смерці паказана, што асноўная прычына смерці Аляксандра – адкрытая рана грудной клеткі, ён памёр ад масіўнай страты крыві. Аляксандру было 34 гады, у яго засталася 3-гадовая дачка.

Менчукі прыйшлі на Альшэўскага. Яны стаяць па абодва бакі вуліцы, у ланцугах, з кветкамі і бел-чырвона-белымі сцягамі. Сярод тых, хто прыйшоў – экс-кандыдат у прэзідэнты 2010 года, паэт і палітык Уладзімір Някляеў.

– Мы не ведалі загінулага, – кажа сямейная пара, якая прыйшла на развітанне з Аляксандрам. – Хочам падтрымаць сям'ю, паказаць, што нас шмат, што мы не забудземся і не даруем той гвалт, які дапусцілі тыя, хто павінен нас абараняць. Мы заснуць не можам ад убачанага жаху, што тварылі з людзьмі на Акрэсціна, як іх білі, як яны крычалі.

Людзі збіраюць ахвяраванні для сям'і. Ініцыятыву выявіў адзін з тых, хто сабраўся:

– Усе грошы буду перададзеныя сёння родным, мы павінны іх падтрымаць! І я прашу вас, людзі, перастаньце братацца з амапаўцамі: нельга забыцца, што яны зрабілі з намі ў гэтыя дні. Пакуль яны не складуць зброю, ніякіх перамоваў.