Жанчыну з Жодзіна, якую міліцыянт ударыў кулаком у твар, пагражаюць затрымаць

Маёр міліцыі, які нанёс жанчыне ўдар, апазнаны.

Жанчыну, якую ў Жодзіна міліцыянт ударыў кулаком у твар, пагражаюць затрымаць. Пра гэта паведамляе ex-press.by.

Маёр міліцыі, які нанёс жанчыне ўдар, апазнаны. У гарадскім Следчым камітэце прынялі заяву аб учыненым злачынстве. Гэтую заяву жыхарка Жодзіна падала ўвечары 13 верасня разам са сваім адвакатам з Менска Марыяй Колесавай-Гудзілінай. Пацярпелая атрымала накіраванне на экспэртызу.

Але ёсць такі момант: на выхадзе з будынка ГАУС жанчыну спынілі, паказалі ёй відэа з масавых мерапрыемстваў, у якіх яна нібыта брала ўдзел, і ўзялі тлумачэнне. Пасля чаго ёй паабяцалі: калі складуць пратакол, магчыма, дзяўчыну затрымаюць.

Нагадаем, жудасны інцыдэнт у Жодзіна здарыўся 13 верасня. На відэа, якое ў момант разляцелася па сацсетках, трапіла сцэна, як падчас славеснай сваркі паміж гараджанамі і сілавікамі міліцыянт раптам б'е жанчыну кулаком у твар - так моцна, што тая падае на асфальт.

Відавочцы мяркуюць, «праваахоўнік» наважыў ужыць фізічную сілу, бо яму не спадабалася, што яго здымаюць на камеру. Іншую прычыну нападу на жанчыну ім назваць складана - жодзінка не вяла сябе агрэсіўна і нават не гутарыла з сілавікамі, а толькі фіксавала тое, што адбываецца, на відэа, як запэўнівала яе прыяцелька, якая ў той момант знаходзілася побач з ёй. За пацярпелую заступіліся мужчыны, пазней яе павезлі ў лякарню.