Расейскія дэпутаты не прыедуць на Форум рэгіёнаў у Беларусь

Усе выступы будуць дыстанцыйнымі.

Дэлегацыя Савета Федэрацыі Расеі не паедзе ў Беларусь на Форум рэгіёнаў, пастанавілі ўдзельнічаць дыстанцыйна, праз відэаканферэнцыю, паведамляе office life.

Гэта пацвердзіў журналістам кіраўнік камітэта палаты ў рэгламенце і арганізацыі парламенцкай дзейнасці Вячаслаў Цімчанка.

Паводле ягоных слоў, выступ спікера Савета федэрацыя Валянціны Мацвіенкі на форуме таксама будзе дыстанцыйным. Са слоў Цімчанкі, ніякай палітычнай падаплёкі ў пастанове сэнатараў удзельнічаць у форуме дыстанцыйна няма, яна ніяк не звязана з палітычнымі падзеямі ў Беларусі.

Раней паведамлялася, што на VII Форуме рэгіёнаў Расеі і Беларусі беларускія прадпрыемствы разлічваюць укласці кантрактаў на $750 млн.