Ігар Лосік спыніў галадоўку

Палітвязня ў жодзінскім СІЗА наведаў адвакат.

Адміністратар тэлеграм-канала «Беларусь галаўнога мозгу» Ігар Лосік знаходзіцца за кратамі з 25 чэрвеня 2020 года - 212 дзён, паведамляе «Радыё Свабода».

З 15 снежня Ігар галадае. Стан палітвязня пагоршыўся пасля месяца галадоўкі, на мінулым тыдні яго перавялі ў камеру, дзе ўстаноўленае сталае відэаназіранне.

25 студзеня з Ігарам Лосікам у турме Жодзіна сустрэўся ягоны адвакат Дзмітрый Лепрэтар. Праз яго Ігар перадаў вялікі зварот для ўсіх, хто яго падтрымлівае:

- Я наважыў спыніць галадоўку. Чаму я гэта зрабіў? Сапраўды на ўласнае жаданне. Я не прымаў ежу больш за сорак дзён, і адчуваю ў сабе сілы і магчымасці пратрымацца яшчэ. Але мяне проста ўзрушыла неймаверная хваля салідарнасці. А таксама просьбы сотняў і тысяч беларусаў спыніцца, дачакацца нашай агульнай перамогі здаровым.

Я ведаю, што многія таксама пачалі галадоўку, пакуль галадаю я. Не магу ўзяць на сябе такі вялікі груз адказнасці, не хачу, каб за мой свядомы выбар пакутавалі іншыя. Чытаючы ўсе вашы просьбы ў лістах, я зразумеў, што проста не магу хваляваць і прымушаць хвалявацца сваю сям'ю і ўсіх вас.

У мяне ніколі не было жадання неяк вылучацца, я не хацеў публічнасці.

Я хацеў проста спакойна жыць і гадаваць сваю дачку. Але мяне вымусілі пайсці на гэты крайні захад.

Мяне арыштавалі задоўга да выбараў, і я не ўяўляў, не ўсведамляў тых кардынальных змен, якія адбыліся за апошнія паўгода. З турмы гэта не так прыкметна. Я зразумеў, што магу на вас разлічваць, бо ў вас усё атрымаецца. Цяпер я ў гэтым абсалютна ўпэўнены. Вам не чужыя спачуванне і салідарнасць, а ім пляваць на пакуты сотняў сем'яў, дзяцей, на чалавечыя жыцці. Вы не падведзяце. Цяпер такія часы, калі няма няправільных пастаноў, ёсць учынкі.

За зімой абавязкова надыходзіць вясна, ноч змяняецца світанкам. Гістарычныя працэсы яшчэ нікому не ўдалося скасаваць або спыніць ніякімі дэкрэтамі, арыштамі або расстрэламі.

Усім вялікі дзякуй за падтрымку, буду чакаць добрых навінаў.

P.S. Шмат хто пісаў, што я нічога не даб'юся. Гэта не так. Сваім учынкам я прыцягнуў увагу не толькі да сваёй справы, але і да становішча з палітычнымі зняволенымі ў нашай краіне. Цяпер пра нас усіх кажуць гучна і на ўсіх магчымых пляцоўках патрабуюць вызвалення нявінна арыштаваных і асуджаных. Гэта нямала. Спадзяюся, што са спыненнем маёй галадоўкі тэма палітычных зняволеных не сыдзе з грамадскага парадку. Яшчэ раз усім дзякуй за падтрымку і салідарнасць.